Թուրքիայի նախագահ Ռեջեփ Թայիփ Էրդողանի դաշնակից, ազգայնական գործիչ Դևլեթ Բահչելին կոչ է արել Թուրքիային և Ադրբեջանին թույլ չտալ, որ տարաձայնությունները վնասեն երկու երկրների հարաբերություններին։ Այս հայտարարությունը հնչել է Էրդողանի հետ հանդիպումից հետո՝ դպրոցներում գլխաշոր կրելու սահմանափակումների շուրջ վեճի ֆոնին, որը լարվածություն է առաջացրել երկու երկրների հարաբերություններում, գրում է Turkish Minute-ը ։ «Չպետք է թույլ տալ, որ որևէ տարաձայնություն սրվի, և որևէ վեճ չպետք է վերածվի երկարատև պառակտման»,- նշել է Ազգայնական շարժում կուսակցության (MHP) առաջնորդը Բահչելիի կոչը հնչել է Էրդողանի գլխավոր խորհրդականներից մեկի՝ Օքթայ Սարալի հրաժարականից հետո։ Սարալը հրաժարական էր տվել Ադրբեջանի դպրոցներում գլխաշոր կրելու սահմանափակումները քննադատելուց հետո։ Սարալը հաստատել է, որ հեռացել է պաշտոնից Էրդողանի հանձնարարությամբ։ Լրագրող Թալաթ Աթիլայի հետ զրույցում հարցին՝ արդյո՞ք Ադրբեջանի հասցեին իր քննադատական հայտարարություններն են պատճառ դարձել պաշտոնը կորցնելու համար, նա պատասխանել է. «Այո, կարծես թե այդպես է»։ Բահչելին ընդգծել է, որ երկրների միջև պատմական կապերը պետք է գերակա լինեն առօրյա քաղաքական տարաձայնություններից, և կոչ է արել հարգել յուրաքանչյուր պետության ինքնիշխանությունը։ Նրա հայտարարությունը հրապարակվել է Անկարայում կայանալիք թյուրքական պետությունների ղեկավարների գագաթնաժողովից առաջ և ուղղակիորեն չի հիշատակել գլխաշորերի հարցը։ Վեճի կենտրոնում Ադրբեջանի դպրոցական հագուստի կանոններն են, որոնք փոփոխվել են սեպտեմբերի 21-ին։ Թեև կանոններում գլխաշորերի մասին ուղղակիորեն նշված չէ, դրանք կրող աղջիկներին թույլ չեն տալիս մուտք գործել դպրոցներ։ Դա բողոքի ցույցեր է առաջացրել Ադրբեջանում, ինչպես նաև քննադատության արժանացել թուրք քաղաքական գործիչների և կրոնական խմբերի կողմից։ Ադրբեջանը պատասխանել է՝ հոկտեմբերի 21-ին արգելելով 31 Թուրքիայի քաղաքացու մուտքը երկիր։ Նրանց մեղադրել են Ադրբեջանի ինքնիշխանությանն ու սահմանադրական կարգին ուղղված հայտարարություններ անելու մեջ։ Ադրբեջանի դատախազությունը նաև պահանջել է ձերբակալել Թուրքիայում բնակվող յոթ անձի՝ բողոքի ելույթների և սոցիալական ցանցերում հրապարակումների համար։ Թուրքիայի ոստիկանությունը երկուշաբթի և երեքշաբթի ձերբակալել է իսլամիստական Köklü Değişim լրատվամիջոցի երկու ներկայացուցչի՝ սահմանափակումները քննադատող հրապարակումների պատճառով։ Նրանցից մեկն ազատ է արձակվել հարցաքննությունից հետո։ Նրան մեղադրել են օտարերկրյա պետության ղեկավարին վիրավորելու մեջ։ Թուրքիան և Ադրբեջանը կապված են լեզվական ու մշակութային ընդհանրություններով, ինչպես նաև պաշտպանության, էներգետիկայի և տրանսպորտի ոլորտներն ընդգրկող դաշինքով։ Երկու երկրների ղեկավարները հարաբերությունները բնութագրում են «մեկ ազգ, երկու պետություն» բանաձևով, ասվում է հրապարակման մեջ։ Թարգմանությունը՝ Էմմա Չոբանյանի Թուրքիայում Բաքվի կողմից անցանկալի անձ հայտարարված ևս մեկ գործիչ է ձերբակալվել