ԱՄՆ առաջին տիկին Մելանյա Թրամփը հայտարարել է, որ Խերսոնի մարզի Օլեշկի քաղաքում հրադադարի գոտին ընդլայնվել է՝ ընդգրկելով նաև քաղաքի հարակից տարածքները։ «Ուկրաինայի և Ռուսաստանի միջև հրադադարն ուժի մեջ է մտել 2026 թվականի հոկտեմբերի 27-ին՝ Մոսկվայի ժամանակով ժամը 04:00-ին։ Ժամկետները երկու օրով առաջ են բերվել նախատեսվածից, որպեսզի ապահովվի խաղաղ բնակչության անվտանգությունը և նպաստվի կենսական նշանակության մարդասիրական օգնության մատակարարմանը։ Խերսոնի մարզի Օլեշկի քաղաքում հրադադարի գոտին ընդլայնվել է՝ ապահովելու մարդասիրական շարասյուների անվտանգ անցումը»,- գրել է նա X սոցիալական ցանցում։ Սպիտակ տունը հոկտեմբերի 23-ին հայտնել էր, որ Մելանյա Թրամփի աջակցությամբ Ռուսաստանն ու Ուկրաինան պայմանավորվածություն են ձեռք բերել Խերսոնի մարզի Օլեշկի քաղաքում հրադադար հաստատելու շուրջ՝ հոկտեմբերի 29-ից։ Ռուսաստանի պաշտպանության նախարարությունն ավելի վաղ հայտնել էր, որ Մոսկվայի ժամանակով ժամը 04:00-ից ռուսական զինված ուժերը դադարեցրել են կրակը Խերսոնի ուղղությամբ և լռության ռեժիմ սահմանել՝ Օլեշկիի մերձակայքում մարդասիրական գործողության նախապատրաստման կապակցությամբ։ Հոկտեմբերի 23-ին ՌԴ ԶՈւ գլխավոր շտաբի պետ, պաշտպանության նախարարի առաջին տեղակալ, բանակի գեներալ Վալերի Գերասիմովը հայտարարել էր, որ մարդկանց անվտանգությունն ապահովելու և սոցիալական նշանակության բեռների մատակարարումը կազմակերպելու նպատակով կիրականացվի ինժեներական հետախուզություն, ինչպես նաև կապահովվի մարդասիրական շարասյան անվտանգ տեղաշարժը դեպի Օլեշկի։ Հոկտեմբերի 26-ին Ռուսաստանի նախագահի մամուլի քարտուղար Դմիտրի Պեսկովը նշել էր, որ Օլեշկիում մարդասիրական գործողություն իրականացնելու շուրջ ձեռք բերված պայմանավորվածությունը կարող է նախադեպ դառնալ այլ հատվածներում ևս նման առաքելություններ կազմակերպելու համար։ Նա ընդգծել էր ամերիկյան կողմի անմիջական և, իր գնահատմամբ, շատ դրական համակարգող դերը։ Պեսկովը հավելել էր, որ Ռուսաստանը հույս ունի՝ ուկրաինական կողմը կկատարի Օլեշկիում մարդասիրական առաքելության իրականացման վերաբերյալ ձեռք բերված բոլոր պայմանավորվածությունները։