Նեթանիահուն պայքարում է իշխանութիւնը պահպանելու համար. հարցումները ընդդիմութեանը փոքր առաւելութիւն են վերագրում, սակայն կառավարութեան ձեւաւորման ելքը մնում է անորոշ Իսրայէլում այսօր՝ հոկտեմբերի 27-ին, մեկնարկել են Քնեսեթի ընտրութիւնները երկրի քաղաքական կեանքի ամենալարւած փուլերից մէկում։ Բենիամին Նեթանիահուի համար քւէարկութիւնը վերածւել է ոչ միայն իշխանութիւնը պահպանելու, այլեւ 2023 թւականի հոկտեմբերի 7-ի անվտանգային ձախողման, պատերազմների եւ դրանց հետեւանքների համար քաղաքական պատասխանատւութեան հարցին դիմակայելու փորձութեան։ Հոկտեմբերի 7-ի ՀԱՄԱՍ-ի յարձակումը, որը բացայայտեց Իսրայէլի հետախուզական եւ անվտանգային համակարգերի լուրջ թերութիւնները, շարունակում է ծանրանալ Նեթանիահուի քաղաքական ժառանգութեան վրայ։ Ընդդիմութիւնը պահանջում է անկախ քննութիւն՝ պարզելու ձախողման պատճառներն ու պետական ղեկավարութեան պատասխանատւութիւնը։ Դրան զուգահեռ՝ Գազայի պատերազմը, Իրանի եւ Լիբանանի դէմ ռազմական գործողութիւնները եւ դրանց տնտեսական ու հասարակական հետեւանքները խորացրել են ներքին տարաձայնութիւնները։ Ն եթանիահուի դիրքերը ճնշման տակ Իսրայէլեան հեռուստաընկերութիւնների վերջին հարցումները առաջատար դիրքեր են վերագրում Գադի Այզենկոտի գլխաւորած ընդդիմադիր ճամբարին։ «Քան»-ի հարցմամբ Նեթանիահուի ճամբարը կարող է ստանալ 50, իսկ Այզենկոտի ճամբարը՝ 52 տեղ։ «12-րդ ալիքի» կանխատեսմամբ՝ համապատասխան թւերը 50 եւ 56 են, իսկ «13-րդ ալիքի» հարցմամբ՝ 50 եւ 54։ Այդուհանդերձ, ընդդիմութեան փոքր առաւելութիւնը դեռ չի նշանակում իշխանափոխութեան անխուսափելիութիւն։ Քնեսեթի 120 տեղերի համար պայքարում վճռորոշ է լինելու ոչ միայն առանձին կուսակցութիւնների արդիւնքը, այլեւ կառավարութիւն կազմելու համար անհրաժեշտ խորհրդարանական մեծամասնութիւն ձեւաւորելու կարողութիւնը։ Ա նվտանգութեան խոստումները հարցականի տակ Նեթանիահուն ընտրապայքարում շեշտադրում է իր ռազմական փորձն ու ԱՄՆ նախագահ Դոնալդ Թրամփի հետ կապերն իրեն ներկայացնելով որպէս Իսրայէլի անվտանգութիւնն ապահովելու ամենափորձառու ղեկավար։ Սակայն հոկտեմբերի 7-ի ձախողումը, բազմաճակատ պատերազմների հետեւանքներն ու հանրային անվստահութիւնը հարցականի տակ են դնում այդ փաստարկը։ Այս ընտրութիւնների ելքը կորոշի ոչ միայն Նեթանիահուի իշխանութեան ապագան, այլեւ այն քաղաքական ուղեգիծը, որով Իսրայէլը կը դիմաւորի տարածաշրջանային յաջորդ զարգացումները։ Նոյնիսկ ընդդիմութեան առաւելութեան դէպքում, առանց խորհրդարանական մեծամասնութեան ձեւաւորման, իշխանութեան փոփոխութիւնը երաշխաւորւած չէ։ Աղբիւրներ՝ ԻՌՆԱ, Reuters, «Թայմզ օֆ Իսրայէլ»։