Հովանաւորութեամբ Նոր Ջուղայի Հայ Մ. Մ. «Արարատ» միութեան Կենտ. վարչութեան եւ համագործակցութեամբ նոյն միութեան Մշակութային միաւորի, հոկտեմբերին, Նոր Ջուղայի Հայ Մ. Մ. «Արարատ» միութեան մարզասրահում տեղի ունեցաւ Սրբոց Թարգմանչաց տօնին նւիրւած գեղարւեստական երեկոյ՝ Թեհրանից ժամանած «Զարթօնք» պարախմբի անզուգական ելոյթներով։ Միջոցառմանը ներկայ էին՝ Սպահանի հայոց թեմի ազգային մարմինների, Հայ Դատի յանձնախմբի, հայոց դպրոցների եւ միութիւնների ներկայացուցիչներն ու ժողովուրդ։ 80 անդամ-անդամուհիներով (5-ից 33 տարեկան) Նոր Ջուղա ժամանած այս խմբի ներկայացման սցենարի ամբողջ ընթացքը զարգանում էր պապ ու թոռնիկի երկխօսութեան շուրջ, որը համեմւած էր պարերի ու երգերի անզուգական կատարումներով։ Այստեղ պապն իր թոռնիկին պատմում էր հայ ժողովրդի պատմութեան դրւագներից, սկսած ողբերգական բաժիններից, որտեղ ներկայացւած էր յատկապէս հարսանիքի ընթացքում թուրքերի յարձակումը եւ գաղթի ճամբին զաւակի կորստից խելագարւած մօր ինքնասպանութիւնը մինչեւ փառապանծ էջերն ու յաղթանակ ներշնչող մասերը՝ հայկական եռագոյն դրօշի, Սիս ու Մասիսի, տառերի գիւտի, Կոմիտասի, ֆիդայական շարժումների ու ազատագրական պայքարների, հայկական քոչարի պարի եւ բազմաթիւ այլ դրւագների բեմականացումով։ Ահա մի հատւածի մէջբերում պապ ու թոռան երկխօսութիւնից. «Իմ զօրաւոր ցաւի մէջ անգամ արեւի լոյս կայ, իմ վրէժի մէջ անգամ աղօթք կայ, ձեր իսկ համար, լսո՞ւմ էք, աշխարհի մարդիկ լսո՞ւմ էք։ Ու յիշէ՛ք, ցաւն անցողիկ է, իսկ մեր երկիրը՝ յաւերժ։ Նայէ՛ք թոռնիկիս աչքերին եւ կը տեսնէք յաւերժութիւնն էլ անուն ունի …»: Հանդիսատեսին հպարտութեան զգացում ներշնչող այս գեղարւեստական միջոցառման ամբողջ ընթացքում բեմականացւեցին տասնեակ պարային ելոյթներ ու երգեր՝ պարախմբի կատարումով ու Մելանի Աւանէսեանի, Մինէ Թահմազեանի, Ֆրելին Մաւաթեանի, Սիփան Մկրտումեանի եւ Մխիթար Վարթինի երգեցողութեամբ։ Ծրագրի բեմայարդարն էր Անտոն Տէր-Յովհաննիսեանը։ Աւելացնենք նաեւ, որ խմբի Նոր Ջուղա կատարած այս այցելութիւնը կազմակերպւել էր անդամների ծնողների եւ ղեկավարի միջոցով։ Նիւթը կազմեց Նոր Ջուղայի թղթակիցը կազմակերպիչների զեկոյցի համաձայն