Հոկտեմբերի 25-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Երեւանում անցկացւող Կենսաբանական բազմազանութեան մասին ՄԱԿ-ի կոնւենցիայի կողմերի 17-րդ համաժողովին (COP17) մասնակից Եկեղեցիների համաշխարհային խորհրդի (ԵՀԽ) էկումենիկ պատւիրակութեանը։ Tert.am-ի համաձայն՝ հանդիպմանն Ամենայն Հայոց Կաթողիկոսը կարեւորեց քրիստոնէական Եկեղեցիների համատեղ յանձնառութիւնը՝ պահպանելու արարչագործութեան ներդաշնակութիւնն ու աստւածապարգեւ բազմազանութիւնը։ Վեհափառ Հայրապետն ընդգծեց, որ մարդուն Աստծուց վերապահւած է արարչաստեղծ բնութեան նկատմամաբ պատասխանատւութիւն, որը պէտք է արտայայտւի մշտական խնամքով ու հոգածութեամբ։ Այս առնչութեամբ Նորին Սրբութիւնը շեշտեց, որ բնապահպանական արդի մարտահրաւէրների յաղթահարմանն ուղղւած ջանքերը պէտք է ուղեկցւեն հոգեւոր եւ բարոյական արժէքների ամրապնդմամբ, որպէսզի մարդկային գիտելիքներն ու ներուժը ծառայեն բնութեան խնամքին եւ պահպանութեանը՝ ի բարօրութիւն ներկայ եւ գալիք սերունդների։ Իր խօսքում Վեհափառ Հայրապետը նաեւ նշեց, որ նման միջազգային համաժողովները առիթ են ճանաչելու Հայոց Եկեղեցու պատմութիւնն ու առաքելութիւնը եւ քրիստոնէական հաւատքով դարերի փորձութիւնները յաղթահարած մեր ժողովրդին։ Անդրադառնալով միջեկեղեցական յարաբերութիւններին՝ Նորին Սրբութիւնը գոհունակութիւն յայտնեց Եկեղեցիների համաշխարհային խորհրդին եւ քոյր Եկեղեցիներին՝ հայ ժողովրդին ու Հայոց Եկեղեցուն ցուցաբերւող զօրակցութեան համար։ Վերջում հիւրերը շնորհակալութիւն յայտնեցին Ամենայն Հայոց Կաթողիկոսին ջերմ ընդունելութեան համար՝ ներկայացնելով պատւիրակութեան առաքելութիւնը։ Վերջիններս խօսեցին կլիմայական փոփոխութիւնների, կենսաբազմազանութեան կորստի եւ շրջակայ միջավայրի աղտոտման հիմնախնդիրների մասին՝ ընդգծելով, որ բնապահպանական ճգնաժամն ունի նաեւ հոգեւոր ու բարոյական արմատներ, ինչը հրամայական է դարձնում Եկեղեցիների ջանքերի մէկտեղումը՝ ի պահպանութիւն արարչաստեղծ աշխարհի։