ԱՄՆ նախագահ Դոնալդ Թրամփը հայտարարել է, որ 1 միլիոն դոլար կվճարի յուրաքանչյուրին, ով տեղեկություններ կհայտնի առաջիկա կամ նախորդ ընտրություններում տեղի ունեցած ընտրակեղծիքների մասին։ Թրամփը չի նշել, թե որտեղից են հատկացվելու վճարումների համար անհրաժեշտ միջոցները։ Truth Social -ում հրապարակված գրառման մեջ նա նշել է, որ գումարը կվճարվի խարդախությունը կատարողների ձերբակալման և դատապարտման դեպքում ։ Այս նախաձեռնությունը Թրամփի՝ միջանկյալ ընտրությունների վրա ավելի մեծ ազդեցություն ունենալու վերջին փորձերից է։ Նրա վարչակազմը զգալի ռեսուրսներ է ուղղել նահանգների ընտրողների ցուցակներում ոչ քաղաքացիներին հայտնաբերելուն։ Արդարադատության նախարարությունը դատի է տվել Կալիֆոռնիայի պաշտոնյաներին՝ փորձելով պարտավորեցնել նրանց առանձնացնել այն փոստային քվեաթերթիկները, որոնք, գերատեսչության պնդմամբ, ուղարկվել են հնարավոր ոչ քաղաքացիներին։ Ուսումնասիրությունները ցույց են տալիս, որ ոչ քաղաքացիների մասնակցությունը քվեարկությանը հազվադեպ երևույթ է։ Անցյալ շաբաթ Արդարադատության նախարարությունը Թրամփի խնդրանքով դատի է տվել Ալյասկայի պաշտոնյաներին՝ փորձելով կանխել ԱՄՆ Սենատի ընտրությունների արդյունքների վավերացումը, եթե Հանրապետական կուսակցության սենատոր Դեն Սալիվանը պարտվի։ Դատարանները նաև արգելել են Թրամփին լայնածավալ փոփոխություններ կատարել փոստային քվեարկության կարգում և քվեարկելու համար քաղաքացիությունը հաստատող փաստաթղթեր պահանջել։ Ավելի վաղ Թրամփը խոստացել էր նաև 5000 դոլար վճարել ամերիկացիներին, եթե իր կուսակցությունը պահպանի Կոնգրեսի վերահսկողությունը։ Նա չի հստակեցրել՝ որտեղից են հատկացվելու այդ վճարումների միջոցները և ինչ սկզբունքով են ընտրվելու գումարը ստացողները։