«Հայաստանյայց Առաքելական Սուրբ Եկեղեցում ճգնաժամն ուսումնասիրող» ԱԺ քննիչ հանձնաժողովի նախագահ Արման Եղոյանը չհստակեցրեց՝ հանձնաժողովի աշխատանքի վերջնական նպատակը Ամենայն հայոց կաթողիկոս Գարեգին Բ-ի հեռացո՞ւմն է, թե՞ ոչ։ Factor TV -ի ուղիղ հարցին ի պատասխան՝ նա պնդեց, որ հանձնաժողովը քննելու է ոչ թե անձանց, այլ իրավահարաբերությունները։ «Հանձնաժողովը անձանց վերաբերյալ չէ, հանձնաժողովը անձանց հարց չի քննում, անձանց վերաբերյալ առաջարկություններ չի ներկայացնելու։ Հանձնաժողովը քննելու է հարաբերությունների վերաբերյալ հարցեր և ներկայացնելու է հարաբերությունների վերաբերյալ առաջարկություններ»,- ասաց Եղոյանը։ Նրա խոսքով՝ հանձնաժողովը քննարկելու է պետության և եկեղեցու հարաբերությունները, եկեղեցու գույքային, հարկային և ֆինանսատնտեսական հարցերը, ինչպես նաև բարձրաստիճան հոգևորականների մասնակցությունը քաղաքական գործընթացներին։ Արդյոք հանձնաժողովը փորձելու է պարզել Գարեգին Բ-ի վերաբերյալ զեկույցում տեղ գտած տեղեկությունների իսկությունը, այդ թվում՝ նրա զավակ ունենալ-չունենալու հարցը։ Այս հարցին Արման Եղոյանը դարձյալ պնդեց, որ հանձնաժողովը չի քննարկելու անձանց հարցերը։ «Սա քրեական դատարան չէ, որտեղ քննարկում են անձի արարք։ Սա իրավահարաբերությունների քննիչ հանձնաժողով է, ոչ թե անձանց արարքների վերաբերյալ քննիչ հանձնաժողով»,- նշեց նա՝ հավելելով, որ իրավահարաբերություններն ուսումնասիրելիս անձանց կարող են անդրադառնալ միայն իրավական բացերը բացահայտելու նպատակով։ Արման Եղոյանի խոսքով՝ հանձնաժողովը պետք է պարզի նաև, թե ինչ սահմաններում են հոգևորականները կարող մասնակցել քաղաքական գործընթացներին։ Որպես օրինակ՝ նա նշեց եպիսկոպոսի՝ նախարար նշանակվելու հնարավորությունը և հարցրել, թե այդ դեպքում ում հանձնարարականները պետք է կատարի հոգևորականը՝ վարչապետի՞, թե՞ Կաթողիկոսի և Գերագույն հոգևոր խորհրդի։ «Որտե՞ղ է դա գրված. ոչ մի տեղ»,- ասաց նա՝ ընդգծելով, որ նման հարցերի իրավական կարգավորման անհրաժեշտություն կա։ Հանձնաժողովի նախագահը նաև հարցականի տակ դրեց եկեղեցու և պետության հարաբերությունները կարգավորող օրենսդրության ամբողջականությունը։ Մանրամասները՝ տեսանյութում։ Արփի Հակոբյան