Թուրքիայի և Ադրբեջանի միջև ստեղծված իրավիճակում կարևոր է հաշվի առնել, որ հանրային քննարկումների մեկնարկը տրվել է թուրքական կողմից, իսկ իրավիճակը չի զարգացել այնպես, որ Ալիևը միջամտի Թուրքիայի ներքին գործերին և պահանջի որևէ անձի ազատել աշխատանքից։ Այս մասին AlphaNews-ի հետ զրույցում ասել է կովկասագետ Կարեն Իգիթյանը: «Սկզբում եղել են որոշակի իրադարձություններ Ադրբեջանում, Ալիևի ելույթը, որից հետո Թուրքիայում արձագանքել են լրագրողներն ու քաղաքական գործիչները։ Դրան Ադրբեջանի արձագանքը բավականին կոշտ է եղել։ Բաքվում դա ընկալել են որպես միջամտություն իրենց ներքին գործերին»,- ասել է Իգիթյանը։ Կովկասագետի գնահատմամբ՝ ստեղծված իրավիճակում Էրդողանը գնացել է զիջումների, սակայն տեղի ունեցածը պետք չէ դիտարկել որպես միակողմանի զիջում։ «Երկու երկրները շատ փոխկապակցված են, բայց այդ հարաբերություններում մեծ եղբոր դերը միշտ ստանձնել է Թուրքիան»,- նշել է նա։ Կարեն Իգիթյանի խոսքով՝ Ալիևն իր հերթին փորձում է մեծացնել Ադրբեջանի քաղաքական կշիռը և ավելի ինքնուրույն գործել տարածաշրջանում։ Այդ նպատակով, ըստ նրա, Բաքուն ձգտում է զարգացնել հարաբերությունները Կենտրոնական Ասիայի երկրների հետ։