ԵՐԵՎԱՆ, 26 հոկտեմբերի – Sputnik. Արագածոտնի մարզի Թալին համայնքի Արտենի բնակավայրի թիվ 1 դպրոցի ճակատային հատվածից Անդրանիկ Օզանյանի նկարը չի ապամոնտաժվել, այլ տեղափոխվել է անվտանգության նկատառումներից ելնելով։ Այս մասին հայտարարություն է տարածել Արտենիի միջնակարգ դպրոցը։Ավելի վաղ shamshyan.com–ը գրել էր, որ դպրոցի ճակատային հատվածից ապամոնտաժվել է զորավար Անդրանիկի նկարը։ Նշվում էր, որ գյուղացիները մի քանի օր հերթապահություն են իրականացրել դպրոցի մոտ, որպեսզի թույլ չտան հեռացնել նկարը, սակայն հոկտեմբերի 23-ին խճանկարն ապամոնտաժվել է հատուկ տեխնիկայի միջոցով։Շեշտվում է, որ հետագայում այդ տարածքի բարեկարգման ավարտից հետո պատկերը կտեղադրվի հանրության համար տեսանելի հատվածում։Նշենք, որ ավելի վաղ հանրային մեծ վրդովմունք էր առաջացրել Երևանի տարբեր հատվածներում շենքերի պատերից, գետնանցումներից Արցախյան պատերազմների հերոսների նկարների հեռացումը։ «Հաղթանակ» զբոսայգու պատից ջնջվել էր նաև 44-օրյա պատերազմի հերոս, հրետանավոր Ալբերտ Հովհաննիսյանի գրաֆիտե պատկերը։Հիշեցնենք, որ այն ժամանակ, երբ դեռ միայն գետնանցումների պատերից էին նկարները հեռացվում, Sputnik Արմենիան դիմել էր Երևանի քաղաքապետարան՝ պարզաբանում ստանալու համար։ Քաղաքապետի մամուլի ծառայությունից հայտնել էին, որ նկարները ջնջում են գետնանցումների բարեկարգման ծրագրի շրջանակում, մինչդեռ զոհված զինծառայողների հարազատները վստահ են, որ Ադրբեջանի իշխանություններին հաճոյանալու, նրանց շահերը սպասարկելու հերթական քայլն է։