ԵՐԵՎԱՆ, 26 հոկտեմբերի – Sputnik. «Մանկական Եվրատեսիլ 2026»-ում հաղթած հայաստանյան պատվիրակ Նարեն առաջիկայում նոր երազանքներ ու նպատակներ է իր առջև դնելու: Այս մասին նա ասաց «Զվարթնոց» օդանավակայանում իրեն դիմավորելու եկած լրագրողներին:Հարցին, թե ինչ նոր երազանքներ ունի, քանի որ նախորդը հենց «Մանկական Եվրատեսիլին» մասնակցելն էր, երգչուհին նշեց՝ դեռ նոր երազանք չունի: Ասաց՝ այս ուղին նոր է ավարտել, գուցե առաջիկայում լինեն այլ երազանքներ: Նա վստահեցրեց՝ նոր նպատակներ նույնպես կավելանան իր կյանքում, ու ինքն էլ անպայման կհասնի դրանց:Նարեն նշեց, որ մրցույթում իր համար ամենակարևորը բազմաթիվ նոր ընկերներ ձեռք բերելն է համարում, որոնց արդեն շատ է կարոտել:Հավելենք, որ «Մանկական Եվրատեսիլ–2026»–ում հաղթած Նարեն ու հայաստանյան պատվիրակությունը Հայաստան են վերադարձել գիշերը։ «Զվարթնոց» օդանավակայանում նրանց սպասում էին բազմաթիվ քաղաքացիներ։ Հիշեցնենք` Հայաստանի էկոնոմիկայի նախկին նախարար Վահան Քերոբյանի դուստրը Հայաստանին հաղթանակ է բերել` «Մանկական Եվրատեսիլ 2026»-ում ներկայացնելով «Boo» երգն ու ստանալով 202 միավոր: Երկրորդ տեղը զբաղեցրել է Իսպանիան, երրորդը՝ Ֆրանսիան։Հայաստանը «Մանկական Եվրատեսիլ» երգի մրցույթին առաջին անգամ մասնակցել է 2007 թվականին։ «Արևիկ» խումբն այդ տարի գրավեց երկրորդ հորիզոնականը` առաջատարին զիջելով ընդամենը 1 միավորով։Առաջին անգամ 2010 թվականին Հայաստանին հաղթանակ բերեց Վլադիմիր Արզումանյանն իր «Մամա» երգով։ Հայաստանին երկրորդ հաղթանակը բերեց Մալենան 2021 թ–ին։ Անցյալ տարի «Մանկական Եվրատեսիլ»-ում Հայաստանը ներկայացնող 12-ամյա Ալբերտ Արմենակյանը «Brave Heart» երգով զբաղեցրեց 4-րդ հորիզոնականը՝ ստանալով 175 միավոր։