Սերբիայի նախկին նախագահ Ալեքսանդր Վուչիչը հայտարարել է, որ իր կոալիցիան պարտվել է խորհրդարանական ընտրություններում. հաղորդում է «ՌԻԱ Նովոստին»։ Հոկտեմբերի 25-ին տեղի ունեցած ընտրություններին մասնակցել է 19 քաղաքական ուժ, որոնք պայքարում էին խորհրդարանում 250 տեղի համար։ Հիմնական պայքարն ընթանում էր Վուչիչի գլխավորած «Միասնական Սերբիա» կոալիցիայի և «Ուսանողական ցուցակ․ ուսանողները հաղթում են» քաղաքացիական խմբի միջև։ Երեք տոկոսանոց շեմը հաղթահարելու հնարավորություն ունի նաև փոխվարչապետ և ներքին գործերի նախարար Իվիցա Դաչիչի գլխավորած «Իվիցա Դաչիչ․ կայունության գործոն» կոալիցիան։ Ընտրատեղամասերի փակումից հետո Սերբիայի ընտրական հանձնաժողովը հայտնել է ռեկորդային մասնակցության մասին։ Ընդհանուր առմամբ գրանցվել է շուրջ 6,5 միլիոն ընտրող։ Վուչիչն արտահերթ խորհրդարանական ընտրություններ անցկացնելու պատրաստակամության մասին հայտարարել էր 2025 թվականի վերջին։ Որոշումը կայացվել էր ուսանողների չդադարող բողոքի ցույցերի ֆոնին, որոնք սկսվել էին 2024 թվականի նոյեմբերին։ Սեպտեմբերի 7-ին նա հաստատել էր խորհրդարանն արձակելու որոշումը։ Նույն օրը իշխող Սերբական առաջադիմական կուսակցությունը (ՍԱԿ) պաշտոնապես առաջադրել էր նրան որպես վարչապետի թեկնածու։ Նախկին նախագահը բազմիցս հայտարարել էր, որ մտադիր է հրաժարական տալ և խորհրդարանական ընտրություններին մասնակցել «որպես սովորական քաղաքացի»։ Անցյալ ամսվա վերջին նա լքել էր իր պաշտոնը։ The post Վուչիչի կոալիցիան ընտրություններում պարտվել է appeared first on Ազգ .