Արթիկի 33/8 ընտրատեղամասի գրանցամատյանում «Ազատ դեմոկրատներ» կուսակցության վստահված անձի արձանագրած խախտման համաձայն՝ «Քաղաքացիական պայմանագիր» կուսակցության վստահված անձն ուղղորդել է ընտրության հարցում։ Հանձնաժողովի նախագահ Ներսես Յուզբաշյանի խոսքով՝ որևէ ուղղորդում տեղի չի ունեցել։ «Ինֆոքոմ»-ի թղթակիցը նկատել է, թե ինչպես է հանձնաժողովի նախագահը մոտենում անդամներին ու ցածր ասում, որ բոլորը ասեն՝ ուղղորդում չկա: Ապա հանձնաժողովի անդամների ստորագրություններով մատյանում արձանագրվել է, որ նման բան չի եղել։ Հանձնաժողովի նախագահը, ի պատասխան «Ինֆոքոմ»-ի հարցի, թե ինքը ուղղորդե՞լ է անդամներին, պնդել է, որ նման բան չի եղել։ Ստեփանավանի 25/27 տեղամասում էլ «Հանրապետություն» կուսակցության վստահված անձը նկատել է, որ «Ուժեղ Հայաստանի» վստահված անձն է ուղղորդել ընտրողին: Մասնավորապես, նա հանձնաժողովի նախագահին տեղյակ պահեց, որ դաշինքի վստահված անձը հարցրել է ընտրողին՝ գիտե՞ս՝ ինչ պիտի անես: Ընտրողն էլ արձագանքել է՝ այո, և նշել քվեաթերթիկի համարը: Հանձնաժողովի նախագահը պարզաբանեց, որ դիտավորություն չի եղել, և թերևս դաշինքի վստահված անձը նկատի է ունեցել ընտրելու կարգը: Միաժամանակ հորդորեց վստահված անձանց զերծ մնալ ընտրողների հետ նմանատիպ խոսակցություններից: Այս մասով, սակայն, գրանցամատյանում որևէ գրառում չկա: The post ՔՊ վստահված անձն ուղղորդել է, թե ոչ․ միմյանց հակասող արձանագրություններ՝ Արթիկի 33/8 տեղամասում appeared first on Infocom .