Ստեփանավանի 25/25 ընտրատեղամասում քաղաքացիներից մեկը չկարողացավ ընտրություն կատարել, քանի որ նրա անունը ցուցակում չկար: Ավելի վաղ «Ինֆոքոմի» թղթակիցը նկատել էր, որ նա տեղամասին մոտեցել էր մեկ այլ տղամարդու ուղեկցությամբ` ճանապարհին քննարկելով քվեարկություն կատարելուն վերաբերող ինչ-որ թեմա։ Ուղեկցող քաղաքացին, տեսնելով որ իր հետ եկած տղամարդու անունը ցուցակում չկա, ընտրատեղամասի սենյակի դռան մոտից ասաց, որ այդ քաղաքացին «խոպան ա գնացել» նույն ժամկետներում մեկ այլ քաղաքացու հետ, ում անունը, սակայն, ցուցակում եղել է: Ընտրության եկած քաղաքացին խնդրեց հանձնաժողովի անդամներին «մի բան անել», որովհետև ինքը պարտադիր ցանկանում է քվեարկել, մինչդեռ հանձնաժողովի անդամները բացատրեցին, որ եթե անունը ցուցակում չկա, իրենք ոչինչ տեղամասի ներսում չեն կարող անել և խորհուրդ տվեցին դիմել անձնագրային բաժին: Քաղաքացին զայրացած դուրս եկավ տեղամասից և շենքի միջանցքի անկյունում ցածրաձայն քննարկման մեջ մտավ իր ուղեկցի ու մեկ այլ քաղաքացու հետ, նրանց հետ էր նաև հանձնաժողովի՝ ՔՊ-ի կողմից առաջադրված անդամը: Տեսնելով տեսախցիկը՝ քաղաքացիներից մեկը ձեռքով փակեց այն և հորդորեց չնկարել, քանի որ ինքը «աշխատող է», հետո բոլորը հեռացան տեղամասի շենքից: Հանձնաժողովի նախագահն ավելի ուշ բացատրեց, որ ինքը չի նկատել միջանցքի անկյունում գտնվող քաղաքացիներին, ու պնդեց, որ քանի որ քաղաքացին փաստացի չի քվեարկել, ուղղորդման մասին խոսք չի կարող լինել։ The post Ստեփանավանի 25/25 ընտրատեղամասում քաղաքացին չկարողացավ ընտրել․ նրա անունը ցուցակում չկար appeared first on Infocom .