ՀՀ Լոռու մարզի Ստեփանավանում տեղի ունեցող ընտրությունների ժամանակ «Ուժեղ Հայաստան» կուսակցությունը մի շարք ընտրախախտումներ է արձանագրել։ Այս մասին լրագրողների հետ զրույցում ասաց սահմանադրագետ, կուսակցության դիտորդ Գոհար Մելոյանը։Նա ճեպազրույցի ընթացքում նաև լուսանկարներ ցույց տվեց, որտեղ մեկ քվեախցիկում 2 անձ էր երևում։ Դեպքեր էլ կային, երբ նույն ընտրատեղամասում, տարբեր անձանց հետ նույն մարդն է քվեախցիկ մտել։ Մելոյանը վստահեցրեց` իր ցուցադրածը լուսանկարներ են, բայց բոլոր տեսանյութերը կան իրենց մոտ։Հարցին` գուցե 1 քվեախցիկում 2 անձի առկայությունը ընտրողին օգնելու համար է, սահմանադրագետը պնդեց` այդպես չէ։ Բացատրեց` ընտրական օրենսգրքում ասվում է, եթե ընտրական իրավունքն իրացնելու ֆիզիկական խնդիր ունի անձը, ապա մատյանում 1 անձի օգնող են գրանցում։ Միևնույն ժամանակ, տվյալ անձը չի կարող ընտրատեղամասում գտնվողներից մեկը լինել (վստահված անձ, հանձնաժողովի անդամ), այլ դրսից հրավիրված անծանոթ, ու նա ընդամենը մեկ անգամ կարող է օգնել։ Նա ընդգծեց նաև, որ ահազանգեր էլ են ստանում մեքենաներով սպասող անձանց մասին, որոնք մարդկանց են դիմավորում, ուղղորդում, ճանապարհում։ Վստահեցրեց, որ որպես կանոն համայնքապետարանների և գյուղապետարանների աշխատակիցներն են սպասողները։