ԵՐԵՎԱՆ, 24 հոկտեմբերի – Sputnik. Հայաստանի մի շարք համայնքներում իրականացվում են վարութային գործողություններ, կան ձերբակալվածներ։ Sputnik Արմենիային այս մասին հայտնեցին ՀՀ հակակոռուպցիոն կոմիտեից։«Հրապարակ օրաթերթն ավելի վաղ հայտնել էր, որ այսօր Արթիկում բերման են ենթարկել «Ապրելու երկիր» և «Հայրենիք» կուսակցությունների անդամներին։ «Ապրելու երկիր» կուսակցության համահիմնադիր Մանե Թանդիլյանն ավելի ուշ հաստատեց, որ բերման ենթարկվածների թվում է նաև կուսակցության համայնքապետի թեկնածու Արթուր Աստոյանը։Հիշեցնենք, որ հոկտեմբերի 25-ին համամասնական ընտրակարգով ՏԻՄ ընտրություններ են կայանալու նաև Արթիկ խոշորացված համայնքում։ Մասնակցում են 4 քաղաքական ուժեր՝ «Ազատ դեմոկրատներ» կուսակցություն (ցուցակը գլխավորում է Մխիթար Վարագյանը), «Ապրելու երկիր» կուսակցություն (ցուցակը գլխավորում է Արթուր Աստոյանը), 3. «Հայրենիք» կուսակցություն (ցուցակը գլխավորում է Լևոն Վահրադյանը), «Քաղաքացիական պայմանագիր» կուսակցություն (նախընտրական ցուցակը գլխավորում է Անանիկ Ոսկանյանը)։Նշենք, որ հոկտեմբերի 21–ին խուզարկություններ էին անցկացվել «Ուժեղ Հայաստան» կուսակցության` Ստեփանավանի գրասենյակում։ Հոկտեմբերի 23-ին հայտնի դարձավ, որ ընտրակաշառք տալու, դրան օժանդակելու, ինչպես նաև ընտրակաշառք ստանալու դեպքերի առթիվ Հակակոռուպցիոն կոմիտեում իրականացվող վարույթի շրջանակում մեղադրանք է ներկայացված ընդհանուր 24 անձի, նրանցից 10-ի նկատմամբ խափանման միջոցներ են կիրառվել կալանքն ու տնային կալանքը։ Կալանավորվածների թվում է նաև Ստեփանավանի համայնքապետի թեկնածու Արսեն Գևորգյանը։