Հայաստան գտնուող ՄԱԿ-ի ընդհանուր քարտուղար Անթոնիօ Կիւթերէշ, որ մասնակցելու համար ժամանած է ՄԱԿ-ի Կենսաբազմազանութեան կողմերու 17-րդ խորհրդաժողովին՝ ՔՈՓ17-ին, յայտարարած է, որ կ՚աջակցի Հայաստանի եւ Ատրպէյճանի միջեւ խաղաղութեան համաձայնութեան կայացման։ Պատասխանելով հայ գերիներու ազատ արձակման վերաբերեալ հարցումի մը՝ Կիւթերէշ նշած է, որ ՄԱԿ-ը բոլոր կողմերուն կոչ կ՚ուղղէ կարելի եղածին չափ արագ գործադրելու խաղաղութեան համաձայնագիրի բոլոր դրոյթները, ներառեալ՝ կալանաւորուած անձերուն վերաբերեալ կէտերը։ Ան ընդգծած է, որ հայ գերիներու հարցը մեծ կարեւորութիւն ունի ՄԱԿ-ին համար։ Աւելի կանուխ Կիւթերէշ հանդիպում ունեցած է Հայաստանի վարչապետ Նիկոլ Փաշինեանի հետ։ Փաշինեան վերահաստատած է, որ Հայաստանի եւ Ատրպէյճանի միջեւ խաղաղութեան համաձայնագիրի ստորագրութիւնն ու վաւերացումը Հայաստանի գլխաւոր նպատակն է՝ ընդգծելով, որ այդ ուղղութեամբ անհրաժեշտ է կեդրոնացած աշխատանք տանիլ։