Ատրպէյճանի հետ խաղաղութեան համաձայնագիրի կարելի եղածին չափ շուտ ստորագրումը Հայաստանի կառավարութեան քաղաքական յանձնառութիւնն է։ Այս մասին, կառավարութեան նիստին ընթացքին յայտարարած է Հայաստանի արտաքին գործոց եւ միջազգային առեւտուրի նախարար Արարատ Միրզոյեան՝ անդրադառնալով նաեւ տարածաշրջանային հաղորդակցութիւններու վերաբացման եւ ԹՐԻՓՓ ծրագրի իրականացման աշխատանքներուն։ Միրզոյեան շեշտած է, որ կառավարութիւնը կ՚ուզէ կարելի եղածին չափ շուտ տեսնել համաձայնագիրին ստորագրութիւնը՝ ընդգծելով, որ ենթակառուցուածքները ունին ոչ միայն տնտեսական, այլեւ խաղաղութեան ամրապնդման նշանակութիւն։ Անդրադառնալով ԹՐԻՓՓ-ի վերաբերեալ հայ-ամերիկեան համաձայնագիրին՝ ան տեղեկացուցած է, որ Ազգային ժողովին մէջ սկսած է անոր վաւերացման պաշտօնական գործընթացը։ Համաձայնագիրը քննարկուած է Արտաքին յարաբերութիւններու մնայուն յանձնաժողովին մէջ եւ նախատեսուած է մօտ մէկ շաբաթ ետք ներկայացնել խորհրդարանի լիագումար նիստին։ Նախարարը նաեւ յայտնած է, որ ԹՐԻՓՓ-ի զարգացման ընկերութեան հիմնադրութեան վերաբերող փաստաթուղթերու մշակումը հասած է եզրափակիչ հանգրուանին։ Փաստաթուղթերու վերջնականացումէն ետք կարելի պիտի ըլլայ անցնիլ գործնական աշխատանքներու յաջորդ փուլին։ Միրզոյեան նշած է նաեւ, որ խորհրդարանական քննարկումներուն ընթացքին ապաշրջափակման ենթակառուցուածքներուն նկատմամբ դրական վերաբերմունք նկատած է նաեւ ընդդիմադիր խորհրդարանական ուժերուն մօտ։