Հայաստանի մէջ տեղի ունեցող ՄԱԿ-ի Կենսաբազմազանութեան կողմերու 17-րդ խորհրդաժողովին՝ ՔՈՓ17-ին, բնիկ ժողովուրդներու իրաւունքներուն եւ կենսաբազմազանութեան պաշտպանութեան հարցերուն քննարկման ընթացքին, Արցախէն բռնի տեղահանուած հայութեան խնդիրները դուրս մնացած են օրակարգէն։ Այս մասին կը հաղորդէ «Ազատութիւն» ձայնասփիւռի կայանը։ Խորհրդաժողովի կազմակերպիչները մերժած են արցախցիներուն տաղաւար տրամադրել՝ պատճառաբանելով, որ անոնց դիմումը դուրս է բնապահպանական օրակարգի թիրախային նիւթերէն։ Այսպիսով, արցախահայերը զրկուած են ՔՈՓ17-ի թէ՛ կանաչ եւ թէ՛ կապոյտ գօտիներուն մէջ ներկայանալու կարելիութենէն։ Մինչ այդ, տարբեր երկիրներու բնիկ ժողովուրդներու ներկայացուցիչներ շեշտած են իրենց իրաւունքներուն եւ հայրենի հողին հետ կապին պահպանման կարեւորութիւնը՝ նշելով, որ տեղահանումը կը խզէ կապը հողին, աւանդական գիտելիքներուն եւ կենսաբազմազանութեան պահպանման միջոցներուն հետ։ Հոկտեմբեր 20-ին «Չկայ կենսաբազմազանութեան պաշտպանութիւն՝ առանց մարդու իրաւունքներու եւ արդարութեան» քաղաքացիական նախաձեռնութիւնը բողոքի ցոյց կազմակերպած է ՄԱԿ-ի գրասենեակին եւ տարբեր դեսպանատուներու դիմաց։ Ցուցարարները պահանջած են միջազգային քննարկումներու ընթացքին բարձրացնել Արցախի բռնի տեղահանուած հայութեան հարցը, ապահովել Արցախի բնութեան եւ մշակութային ժառանգութեան անկախ միջազգային մշտադիտարկումը եւ աջակցիլ արցախահայերու ապահով, կամաւոր ու արժանապատիւ վերադարձի իրաւունքի իրականացման։ ՔՈՓ17-ի խորհրդաժողովը պիտի շարունակուի մինչեւ Հոկտեմբեր 30։