Հոկտեմբերի 23-ին Սև ծովում հերթական միջադեպն է գրանցվել: Ռումինիայի Կոնստանցա նավահանգստից մոտ 13 ծովային մղոն հեռավորության վրա խորտակվել է Կոմորյան կղզիների դրոշի ներքո նավարկող «Խորիվ» առևտրային նավը: Նախնական տվյալներով՝ նավը թիրախավորվել է անօդաչու թռչող սարքի կողմից, ինչից հետո այնտեղ հրդեհ է բռնկվել: Նավի վրա գտնվել է անձնակազմի 13 անդամ, որոնցից 10-ը Ուկրաինայի, իսկ 3-ը՝ Ադրբեջանի քաղաքացիներ են: Տեղական ժամանակով ժամը 10:00-ի սահմաններում նավից արձակվել է աղետի ազդանշան, ինչից հետո Ռումինիայի ծովափնյա պահպանության ծառայությունն անմիջապես սկսել է փրկարարական գործողությունը: Վերջին տվյալներով՝ հաջողվել է փրկել 9 նավաստու: Հաստատվել է առնվազն 1 մարդու մահ, անձնակազմի 3 անդամ այս պահին համարվում է անհետ կորած: Փրկարարները նշում են, որ որոնողական աշխատանքները ծովում խիստ բարդ են եղանակային անբարենպաստ պայմանների, ուժեղ փոթորկի և ցածր տեսանելիության պատճառով, և հնարավոր չի եղել օգտագործել փրկարարական ուղղաթիռներ: