Ուկրաինայի տարածքում Starlink արբանյակային կապի աշխատանքի սահմանափակումները դեռևս գործում են։ Այս մասին հայտարարել է Վլադիմիր Զելենսկին։ «Մենք Starlink-ը ստուգել ենք գիշերը, վաղ առավոտյան, ապա՝ ցերեկը։ Ստուգել ենք մի քանի կապուղի՝ տարբեր ուղղություններով, քաղաքացիական հատվածում և առաջնագծին ավելի մոտ։ Գիտե՞ք՝ սահմանափակումը նույնն է՝ առավելագույնը ժամում 161 կիլոմետր, այսինքն՝ 100 մղոն»,- ասել է նա՝ Վաշինգտոնում Հադսոնի ինստիտուտի լսարանի հետ առցանց զրույցի ընթացքում։ Զելենսկու խոսքով՝ Կիևը դեռ հույս ունի, որ SpaceX-ն ու ԱՄՆ վարչակազմը կվերացնեն սահմանափակումները։ Նրա գնահատմամբ՝ դա կարող է տևել երկու-երեք օր կամ ավելի։ Անցած շաբաթ Կիևում հայտարարել էին, որ SpaceX-ը Ուկրաինայի զինված ուժերի համար սահմանափակել է Starlink-ի տերմինալների աշխատանքը ժամում 160 կիլոմետրից բարձր արագության դեպքում։ Դրա հետևանքով ուկրաինացի զինվորականների մի քանի գործողություն ձախողվել է։ SpaceX-ի հիմնադիր Իլոն Մասկը, իր հերթին, հայտարարել էր, որ Starlink արբանյակային համակարգը չի օգտագործվում հարձակողական ռազմական գործողությունների համար, այլ ծառայում է միայն պաշտպանական և քաղաքացիական նպատակների։ Նրա խոսքով՝ Starshield համակարգերը պատկանում են ԱՄՆ կառավարությանը և գտնվում են դրա վերահսկողության ներքո, իսկ արագության կամ օգտագործման սահմանափակումները սահմանում է ԱՄՆ զինված ուժերը, և վերջնական որոշումը կայացնում է երկրի նախագահը։ Միևնույն ժամանակ, The Wall Street Journal-ը գրել էր, որ հենց Մասկն է կարգադրել սահմանափակել Ուկրաինայի հասանելիությունը Starshield համակարգին։ Հոկտեմբերի 22-ի երեկոյան ԱՄՆ նախագահ Դոնալդ Թրամփը հայտարարել էր, որ Ուկրաինայի հասանելիությունը ռազմական նշանակության Starshield արբանյակային կապին վերականգնվել է։ Սակայն նա չէր պատասխանել հարցին, թե կոնկրետ ով է տվել համապատասխան կարգադրությունը։