Հոկտեմբերի 22-ի գիշերը Ռուսաստանը բալիստիկ հրթիռներով, կասետային զինամթերքով և անօդաչու թռչող սարքերով հարվածել է Կիևին՝ թիրախավորելով տրանսպորտային, էներգետիկ և բժշկական ենթակառուցվածքները։ Ուկրաինացի պաշտոնյաների տվյալներով՝ Կիևում և Կիևի մարզում զոհվել է առնվազն երկու մարդ, վիրավորվել՝ 34-ը, այդ թվում՝ երեխաներ։ Հարվածների հետևանքով վնասվել են բնակելի շենքեր, բժշկական հաստատություն, շտապօգնության կայան և վեց շտապօգնության մեքենա, ինչպես նաև խանութներ ու Կիևի պատմության թանգարանի մասնաճյուղը։ Որոշ շրջաններում հրդեհներ են բռնկվել, գրանցվել են էլեկտրաէներգիայի անջատումներ։ Ուկրաինայի նախագահ Վլադիմիր Զելենսկու խոսքով՝ Ռուսաստանը Կիևի ուղղությամբ կիրառել է նաև կասետային մարտագլխիկներով բալիստիկ հրթիռներ։ Նա հայտարարել է, որ հրթիռներից մեկն ընկել է քաղաքի պատմական կենտրոնում՝ վնասելով քաղաքացիական ենթակառուցվածքները։ Ուկրաինայի ռազմաօդային ուժերի տվյալներով՝ Ռուսաստանը հարձակման ընթացքում կիրառել է տարբեր տեսակի 210 անօդաչու թռչող սարք և հրթիռներ։ Հակաօդային պաշտպանությունը խոցել է 181 անօդաչու թռչող սարք։ Ուկրաինայի իշխանությունները նաև հայտնել են, որ հոկտեմբերի 11-ից ի վեր Ռուսաստանը ավելի քան 170 հարված է հասցրել երկրի կարևոր էներգետիկ օբյեկտներին։