Ֆուտբոլի Հայաստանի Պրեմիեր լիգայի 11-րդ տուրում Երևանի «Փյունիկը» «Freedom Arena» նորակառույց մարզադաշտում ընդունեց Կապանի «Գանձասարին» ու վստահ հաղթանակ տարավ 3:0 հաշվով: Դաշտի տերերը բոլոր գոլերը խփեցին երկրորդ խաղակեսում։ Դուբլի հեղինակ դարձավ սերբ հարձակվող Սեադ Իսլամովիչը, մեկ անգամ էլ «Գանձասարը» գրավեց սեփական դարպասը։ Այս հաղթանակից հետո «Փյունիկը» շրջանցեց «Արարատ-Արմենիային» և 26 միավորով բարձրացավ երկրորդ տեղ: «Գանձասարը» 3 միավորով եզրափակում է մրցաշարային աղյուսակը: Սա առաջին հանդիպումն էր «Freedom Arena»-ում: ՈՒԵՖԱ-ի երկրորդ կատեգորիայի ստանդարտներին համապատասխան նորակառույց մարզադաշտը գտնվում է Թուրինի «Յուվենտուսի» հայաստանյան ֆուտբոլային ակադեմիայի տարածքում՝ «Փյունիկի» մարզադպրոցի հարևանությամբ: Երևանյան ակումբն այսուհետև տնային խաղերն անցկացնելու է «Freedom Arena»-ում: Դավիթ Եղիազարյան