ԱՄՆ նախագահ Դոնալդ Թրամփը հայտարարել է, որ ամերիկացի գործարար, SpaceX ընկերության հիմնադիր Իլոն Մասկը «ոչ մի վատ բան չի արել»՝ մեկնաբանելով Ուկրաինայում Starlink և Starshield արբանյակային կապի համակարգերի աշխատանքի սահմանափակումների մասին հաղորդումները։ «Իլոնը ոչ մի վատ բան չի արել։ Իլոնը շատ լավ մարդ է»,- ասել է Թրամփը Սպիտակ տանը՝ պատասխանելով հարցին, թե արդյոք դեմոկրատները կարող են հետաքննություն սկսել Մասկի նկատմամբ։ ԱՄՆ նախագահը հավելել է, որ Մասկը շատ տաղանդավոր է, այլապես Starlink-ն ու նրա մյուս նախագծերը չէին լինի։ «Ես նրան շատ լավ եմ ճանաչում։ Նա արդար մարդ է։ Սա անսովոր իրավիճակ է, երբ գործ ունես մասնավոր ընկերության հետ»,- նշել է Թրամփը։ Հարցին, թե ինչու են Ուկրաինայում սահմանափակվել Starlink-ի և Starshield-ի աշխատանքները, ԱՄՆ նախագահը պատասխանել է. «Ես գաղափար չունեմ, բայց եթե իմանայի էլ, չէի ասի»։ Հինգշաբթի Թրամփը հայտարարել էր, որ Ուկրաինայի հասանելիությունը ռազմական նշանակության Starshield արբանյակային կապի համակարգին վերականգնվել է։ Նա այսպես էր մեկնաբանել լրատվամիջոցների հաղորդումները, որոնց համաձայն՝ դիմել էր Մասկին՝ Ուկրաինայում Starshield-ի օգտագործման սահմանափակումները վերացնելու խնդրանքով։ Միևնույն ժամանակ, Ուկրաինայի պաշտպանության նախարարի նախկին խորհրդական Սերգեյ Սթերնենկոն ավելի ուշ հայտարարել է, որ սահմանափակումները մասամբ դեռ պահպանվում են։