ԱՄՆ հատուկ ծառայությունները չեն կրճատում Կիևին ցուցաբերվող աջակցության ծավալները՝ չնայած ուկրաինական հակամարտության կարգավորման ուղղությամբ Ռուսաստանի և ԱՄՆ-ի ակտիվացած ջանքերին։ Այս մասին գրում է The Atlantic ամսագիրը։ Հրատարակության տեղեկություններով՝ ԱՄՆ հետախուզական համայնքը շարունակում է նույն ինտենսիվությամբ աջակցել Ուկրաինային։ Ամերիկայի տրամադրած հետախուզական տվյալների շնորհիվ ուկրաինական զինված ուժերը հարվածներ են հասցնում Ռուսաստանի խորքում, իսկ ԱՄՆ լրտեսական արբանյակները նախազգուշացնում են ռուսական հրթիռների և անօդաչուների մասին։ Ամսագիրը, հղում անելով Ուկրաինա հաճախ այցելող՝ պաշտոնաթող բարձրաստիճան սպայի, գրում է, որ երկրի տարածքում գործող ամերիկացի ներկայացուցիչների թվում առաջատար դեր ունի Կենտրոնական հետախուզական վարչությունը՝ ԿՀՎ-ն։ Բացի այդ, Բալթյան երկրներից մեկում աշխատող և ամերիկացիների հետ սերտ համագործակցող հետախույզը պնդել է, որ ԿՀՎ-ի գործողություններն այժմ «շատ ավելի ագրեսիվ» են, քան Ջո Բայդենի նախագահության օրոք՝ չնայած ԱՄՆ գործող նախագահ Դոնալդ Թրամփի հռետորաբանությունից դա հնարավոր չէ եզրակացնել։