Ախալքալաք քաղաքից մինչև Կումուրդո գյուղի խաչմերուկը մի քանի կիլոմետր երկարությամբ խցանում է առաջացել, երթևեկությունը պարալիզացված է։ Պատճառը Ախալքալաքի բերդի մոտ փչացած մարդատար մեքենան է։ Մեքենան ընկել է մեծ փոսի մեջ, ինչի հետևանքով վնասվել է էլեկտրոնային համակարգը։ Վարորդը զանգահարել է «112» ծառայություն և սպասում է օգնության։ Ախալքալաքի բերդի մոտ, մինչև «Գորոդոկը» չհասած, կիլոմետրանոց խցանումներ են առաջացել։ Պատճառն Ախալքալաքի բերդի մոտ գտնվող կամրջի հարևանությամբ փչացած մարդատար մեքենան է։ Մեքենան փորձել է զգուշորեն անցնել փոսի միջով, սակայն մնացել է դրա մեջ, և մեքենայի էլեկտրոնային համակարգը շարքից դուրս է եկել։ Արդյունքում ճանապարհի երկու կողմերից եկող մեծ բեռնատարները չեն կարողացել անցնել, և խցանում է առաջացել։ Դեպքի վայր են ժամանել պարեկային ոստիկանության աշխատակիցները, որոնք փորձում են կարգավորել երթևեկությունը։ Ժամը 17:00-ի դրությամբ երթևեկությունն արդեն վերականգնվել էր։ Փչացած մեքենայի դիագնոստիկան է իրականացվում։ Հիշեցնենք, որ այսօր՝ հոկտեմբերի 23-ին, Կարծախ գյուղում գյուղի բնակիչներն ու տարբեր երկրներից ժամանած բեռնատարների վարորդները միտումնավոր փակել էին Ախալքալաք-Կարծախի միջազգային նշանակության ճանապարհը՝ պահանջելով կարգի բերել այն, քանի որ առանց կորուստների այդ ճանապարհով անցնելն անհնար է։ Սակայն ճանապարհը երկար ժամանակ փակ չմնաց։ Այն բացվեց Ախալքալաքի ոստիկանության վարչության պետի ժամանելուց հետո։ Ավելի ուշ հավաքված բնակիչների մոտ մեկնեցին խորհրդարանի պատգամավոր Սամվել Մանուկյանը և Ախալքալաքի քաղաքապետ Մելքոն Մակարյանը։ Նրանք բնակիչներին խոստացան, որ երկուշաբթի օրը գրեյդերը կհարթեցնի փոսերը։ Ախալքալաք-Կարծախի ճանապարհն արդեն մի քանի տարի է՝ չլուծվող խնդիր է տեղի բնակիչների և տարանցիկ բեռնատարների վարորդների համար։ Ճանապարհի վերականգնումը նախատեսվում է արդեն մի քանի տարի, սակայն աշխատանքները չեն սկսվում։