Հայաստանի անդամակցության կասեցման հետևանքների մասին ԵԱՏՄ անդամ 4 երկրի ներկայացուցիչների զեկույցում նշվում է գազի գնի հնարավոր 69 տոկոս թանկացման մասին։ Նիկոլ Փաշինյանը երեկ ճեպազրույցի ժամանակ հայտարարեց, որ չի կարող երաշխիքներ տալ գազի գնի փոփոխության վերաբերյալ։ Տնտեսագետ Թաթուլ Մանասերյանն ABC Media -ի հետ զրույցում նշեց, որ ԵԱՏՄ անդամ պետությունների ներկայացրած կանխատեսմանը պետք է լուրջ վերաբերվել։ Անդրադառնալով Փաշինյանի այն դիտարկմանը, թե նախորդ 6 տարում գազի գինը երկու անգամ փոխվել է, բայց քաղաքացիները չեն զգացել թանկացումը՝ Մանասերյանն ասաց, որ Կառավարությունը պետք է բացատրի՝ ինչպես է դա հաջողվել։ Նախ Կառավարությունը պարտավոր էր դրա մասին տեղեկացնել ազգաբնակչությանը, քաղաքացիներին, ինչը չի արել, և դա բնավ հպարտանալու առիթ չէ, այլ, կարծում եմ, շատ մեծ բացթողում է, և երկրորդը՝ պետք է այդ դեպքում մատնանշի, թե հատկապես ի՞նչ գործիքներ են կիրառվել, որ ազգաբնակչությունը չի զգացել այդ թանկացումը ,- ասաց Մանասերյանը։ Տնտեսագետի գնահատմամբ՝ գազի հնարավոր թանկացումն ազդելու է ոչ միայն կոմունալ վճարների, այլև տնտեսության տարբեր ոլորտների և քաղաքացիների սոցիալական վիճակի վրա։ Գազը քաղաքատնտեսական կատեգորիա է, և այն ազդելու է ոչ միայն տնտեսական, այլ նաև քաղաքական գործընթացների և, բնականաբար, մարդկանց սոցիալական վիճակի վրա ,- նշեց Մանասերյանը։ Ըստ նրա՝ գազը գնագոյացման կարևոր գործոն է, քանի որ դրա արժեքն ազդում է ապրանքների և ծառայությունների ինքնարժեքի վրա։ Գազը գնաստեղծ գործոն է, այսինքն՝ գին ձևավորող գործոն է, այն պարզ ապրանք չէ, չկա տնտեսության մի ոլորտ, որի արտադրանքի կամ ծառայության մեջ, ինքնարժեքի բաղադրիչների մեջ չլինի գազը ,- ասաց նա։ Մանասերյանի խոսքով՝ Կառավարությունը պետք է պատասխան տա նաև այն հարցին, թե ինչ միջոցներով է պատրաստվում մեղմել հնարավոր թանկացման հետևանքները՝ հաշվի առնելով Հայաստանի սահմանափակ ֆինանսական հնարավորությունները։ Այդ դեպքում փոքր Հայաստանը սահմանափակ ֆինանսական ռեսուրսներով ինչպե՞ս պետք է դա անի, սա կարծում եմ, որ Կառավարության պատասխանատվությունն է ,- եզրափակեց Մանասերյանը։ Անի Աբաղյան