Հայաստանը փաստացի դադարեցրել է իր մասնակցությունը Հավաքական անվտանգության պայմանագրի կազմակերպությանը, ՏԱՍՍ-ին ասել է ՀԱՊԿ-ի գլխավոր քարտուղար Տաալատբեկ Մասադիկովը։ Նա նշել է, որ Երևանը ստանում է կազմակերպության փաստաթղթերը, բայց չի մասնակցում հարցերի մեծ մասի կամ կարևորագույն իրադարձությունների քննարկումներին։ Մենք փաստաթղթեր ենք ներկայացնում ներքին հաստատման համար։ Մենք նաև ամեն ինչ ուղարկում ենք Հայաստան։ Եվ յուրաքանչյուր հարցի համար մենք պատասխան ենք ստանում, որ հայկական կողմը չի մասնակցում այս հարցի քննարկմանը և որոշումների կայացմանը, բայց դեմ չէ սահմանափակ ձևաչափով որոշումների կայացմանը։ Այլ կերպ ասած՝ նրանք չեն խոչընդոտում մեր աշխատանը. աշխատանքը շարունակվում է, և մենք որոշումներ ենք կայացնում։ Նրանք լսում են շաբաթական զեկույցները, բայց չեն մասնակցում մեր հիմնական միջոցառումներին, զորավարժություններին և այլն։ Հետևաբար, կարծում եմ, որ այստեղ գործում է ՀԱՊԿ կանոնադրության հենց 25-րդ հոդվածը։ Փաստորեն, նրանք արդեն փաստացի դուրս են եկել», – հայտարարել է Մասադիկովը։ Ավելի վաղ ՀԱՊԿ գլխավոր քարտուղարը հայտարարել էր, որ Հավաքական անվտանգության պայմանագրի կազմակերպության պետությունների ղեկավարները կարող են քննարկել Հայաստանի անդամակցության հարցը նոյեմբերի 11-ին կայանալիք Հավաքական անվտանգության խորհրդի նստաշրջանում։ Նա նշել է, որ դա հնարավոր է, եթե համապատասխան առաջարկը ներառվի հանդիպման օրակարգում։