ԱՄՆ նախագահ Դոնալդ Թրամփը դիմել է SpaceX ընկերության հիմնադիր Իլոն Մասկին՝ պահանջելով վերացնել Ուկրաինայում ռազմական նշանակության Starshield արբանյակային կապի համակարգի օգտագործման սահմանափակումները։ Այս մասին, հղում անելով աղբյուրներին, հայտնում է The Wall Street Journal-ը։ Պարբերականի տեղեկություններով՝ Թրամփի և Մասկի հեռախոսազրույցից կարճ ժամանակ անց համակարգերը սկսել են աշխատել, սակայն կապի արագությունը դեռ ամբողջությամբ չի վերականգնվել։ SpaceX-ը հրաժարվել է մեկնաբանություններից, իսկ Սպիտակ տունը հղում է արել ԱՄՆ նախագահի ավելի վաղ հայտարարությանը, թե ինքը կապ չունի հասանելիության սահմանափակման հետ։ Հոկտեմբերի 20-ին The Wall Street Journal-ը հայտնել էր, որ Ուկրաինայի համար Starshield համակարգի հասանելիությունը սահմանափակելու որոշումը կայացրել է անձամբ Մասկը։ Պարբերականի աղբյուրների համաձայն՝ վերջին շաբաթներին թե՛ Մասկը, թե՛ Թրամփը դժգոհություն էին հայտնել Ռուսաստանի նավթավերամշակման գործարաններին ուկրաինական հարվածների կապակցությամբ։ Անցած շաբաթ Մասկը սահմանափակել էր Ուկրաինայի համար տվյալների փոխանցման արագությունը, ինչի հետևանքով ուկրաինական հարվածային և որսացող անօդաչու թռչող սարքերից մի քանիսը գործնականում անօգտագործելի էին դարձել։ Թերթի ընդգծմամբ՝ որոշումն ընդունվել էր Մասկի միանձնյա կարգադրությամբ։ The New York Times-ի գնահատմամբ՝ սահմանափակումների հետևանքով Ուկրաինայի զինված ուժերը կորցրել են տասնյակ անօդաչու թռչող սարքեր՝ առնվազն մեկ միլիոն դոլար ընդհանուր արժեքով։ Starshield համակարգի խափանումներն ու զինտեխնիկայի զգալի կորուստները ստիպել են ուկրաինական ուժերին երեք օրով դադարեցնել գրեթե բոլոր գործողությունները։