Վոլոդիմիր Զելենսկին անընդունելի և սխալ է համարել ԱՄՆ նախագահ Դոնալդ Թրամփի մեղադրանքները, որ Միացյալ Նահանգներում դիզելի գինը բարձրանում է ռուսական նավթավերամշակման գործարաններին ուկրաինական հարվածների պատճառով: Ուկրաինայի նախագահի խոսքով՝ ՌԴ նախագահ Վլադիմիր Պուտինը մերժում է էներգետիկ հրադադարի Թրամփի առաջարկը, սակայն թանկացման համար մեղադրում է իրեն, ոչ թե Պուտինին: Նրա պնդմամբ՝ վառելիքի գնի բարձրացման պատճառը իրավիճակն է Հորմուզի նեղուցում, որտեղ արգելափակված է մեծ քանակությամբ դիզելային վառելիք: Նա նշել է նաև, որ Թրամփից հակաօդային պաշտպանության հրթիռներ է խնդրել, որոնց համար կվճարի Եվրոպան, սակայն Վաշինգտոնը հրաժարվում է դրանք տրամադրել՝ Մերձավոր Արևելքում իրավիճակի պատճառով: Զելենսկին նաև համոզմունք է հայտնել, որ Թրամփը կարող է շատ հեշտությամբ Պուտինին բերել բանակցությունների սեղանի շուրջ, սակայն դժվարացել է ասել, թե ինչու դա տեղի չի ունենում: Ավելի վաղ Զելենսկին հայտարարել էր, որ պատրաստ է սառեցնել ռազմական գործողությունները ներկայիս ռազմաճակատի գծում՝ նշելով, որ դա պատերազմն ավարտելու իրական ճանապարհ է: