Ֆրանսիական BFMTV հեռուստաալիքի հրապարակած՝ Ifop-ի հարցման համաձայն՝ Ֆրանսիայի աջակողմյան Ազգային միավորում կուսակցության առաջնորդ Մարին Լը Պենը կարող է համոզիչ հաղթանակ գրանցել 2027 թվականի գարնանը կայանալիք նախագահական ընտրություններում։ Երկրորդ փուլում նրա առավելությունը մրցակիցների նկատմամբ, կախված նրանից, թե ով կհայտնվի մրցապայքարում, կարող է կազմել 12-36 տոկոսային կետ։Ըստ հարցման՝ առաջին փուլում Լը Պենը կարող է ստանալ ձայների 34-38 տոկոսը՝ մոտակա մրցակցին գերազանցելով 18-22 տոկոսային կետով։ Անհնազանդ Ֆրանսիա ծայրահեղ ձախակողմյան կուսակցության առաջնորդ Ժան-Լյուկ Մելանշոնը կարող է հավաքել 15-20 տոկոս ձայն։ Սոցիալիստ Ռաֆայել Գլյուքսմանը և նախկին վարչապետ, Լը Հավրի քաղաքապետ Էդուար Ֆիլիպը, որը ներկայացնում է աջ կենտրոնամետ Հորիզոններ կուսակցությունը, կարող են ստանալ 12-16-ական տոկոս։ Ընդ որում՝ Գլյուքսմանի դիրքերը փոքր-ինչ ավելի ամուր են թվում։ Երկրորդ փուլում Լը Պենը հարցման մեջ դիտարկված բոլոր մրցակիցներից առաջ է։ Նրա մրցակիցներից առավել մոտ արդյունքը կարող է գրանցել Ֆիլիպը։ Այս դեպքում Ազգային միավորում կուսակցության թեկնածուն կարող է ստանալ ձայների 56 տոկոսը, իսկ նրա մրցակիցը՝ 44 տոկոսը։ Եթե երկրորդ փուլում Լը Պենի մրցակիցը լինի Մելանշոնը, ապա տարբերությունը կարող է հասնել 36 տոկոսային կետի՝ 68 տոկոս՝ 32 տոկոսի դիմաց։ Հարցման արդյունքներն արտացոլում են հասարակական տրամադրությունները՝ անցած հանգստյան օրերին տեղի ունեցած բողոքի ցույցերի ֆոնին, որոնք շատ դեպքերում վերածվել են լայնածավալ անկարգությունների։ Արևմտյան լրատվամիջոցները նշել են, որ ջարդարարությունների մասնակիցների թվում եղել են ներգաղթյալներ, ինչպես նաև այլ երկրներից ժամանածների երեխաներն ու թոռները։ Լը Պենը հանդես է գալիս միգրացիոն քաղաքականության խստացման օգտին, մինչդեռ Ֆրանսիայի իշխանությունները կողոպուտների և ջարդերի պատասխանատվությունը վերագրել են ծայրահեղ ձախակողմյան ուժերի ներկայացուցիչներին։