Գերմանիայի կանցլեր Ֆրիդրիխ Մերցը կարծում է, որ Եվրամիությունը պետք է շարունակի ընդլայնվել՝ ամրապնդելու իր ինքնիշխանությունն ու դիրքերը աշխարհում։ «Մենք ձգտում ենք պահպանել ԵՄ ընդլայնման այս դինամիկան։ Եվրամիությունը պետք է աճի, եթե ցանկանում է աշխարհում ամրապնդել իր ինքնիշխանությունը և ընկալվել որպես հզոր ուժ»,- ասել է Մերցը Չեռնոգորիայում՝ այսպես կոչված Բեռլինի գործընթացի շրջանակում անցկացված գագաթնաժողովի արդյունքներով լրագրողների հետ զրույցում։ Կանցլերի խոսքերը փոխանցել է Գերմանիայի կառավարության մամուլի ծառայությունը։ Միաժամանակ Մերցն ընդգծել է, որ եվրոպական ինտեգրման «քաղաքական կամքը պետք է բխի հենց տարածաշրջանից»։ Բեռլինի գործընթացը մեխանիզմ է, որի նպատակն է աջակցել Ալբանիայի, Բոսնիա և Հերցեգովինայի, Հյուսիսային Մակեդոնիայի, Սերբիայի, Չեռնոգորիայի և չճանաչված Կոսովոյի եվրոպական ինտեգրմանը։ Այն նախաձեռնել է Գերմանիայի այն ժամանակվա կանցլեր Անգելա Մերկելը՝ 2014 թվականին։