Ալբանիայի խորհրդարանում հերթական լիագումար նիստը վերածվել է մասսայական քաշքշուկի և ծեծկռտուքի, ինչի պատճառով նիստը ստիպված են եղել ընդհատել։ Իրավիճակը կտրուկ լարվել է այն բանից հետո, երբ ընդդիմադիր պատգամավորները կառավարությանը և իշխող մեծամասնությանը մեղադրել են մայրաքաղաք Տիրանայում արդեն 10 օր շարունակվող ուսանողական և հակակառավարական ցույցերի ընթացքում ոստիկանական բռնություններ կիրառելու մեջ։ Վիճաբանությունը բռնկվել է այն պահին, երբ ընդդիմադիր պատգամավոր Ֆլամուր Նոկան մոտեցել է իշխող կուսակցության անդամների նստարաններին և փորձել խլել քվեարկության քարտերը։ Դրանից հետո պատգամավորների միջև սկսվել է ձեռնամարտ։ Ընդդիմադիր պատգամավորները տեղերից պոկել են բարձրախոսները, տարբեր իրեր նետել իշխանական գործընկերների ուղղությամբ և բարձրացրել ցույցերի ժամանակ տուժած ուսանողների լուսանկարները՝ փորձելով ամբողջությամբ տապալել նիստը։ Ալբանիայում արդեն տևական ժամանակ է, ինչ ընթանում են զանգվածային բողոքի ցույցեր՝ ընդդեմ կոռուպցիայի, կրթության ցածր մակարդակի և բարձր վարձավճարների, իսկ ցուցարարները պահանջում են վարչապետի հրաժարականը։ Նախկին նախագահ Սալի Բերիշայի գլխավորած ընդդիմությունը հայտարարել է, որ խորհրդարանը կորցրել է իր լեգիտիմությունը: