ԵՐԵՎԱՆ, 22 հոկտեմբերի – Sputnik. «Ատոմային նոր էներգաբլոկի կառուցում» ՓԲԸ-ի տնօրենի ժամանակավոր պաշտոնակատար է նշանակվել Գարիկ Նալբանդյանը։ Այս մասին տեղեկանում ենք ՀՀ ՏԿԵ նախարարությունից։Նշվում է, որ ՀՀ ՏԿԵ նախարարի տեղակալ Նարեկ Ապիտոնյանը էներգետիկ ընկերությունների ղեկավարներին է ներկայացրել «Ատոմային նոր էներգաբլոկի կառուցում» ՓԲԸ-ի տնօրենի ժամանակավոր պաշտոնակատար Գարիկ Նալբանդյանին։Հանդիպման ընթացքում քննարկվել են օրակարգային մի շարք հարցեր՝ կապված էներգետիկ ոլորտում ընթացիկ աշխատանքների, առկա խնդիրների և համագործակցության հետագա կազմակերպման հետ։Սեպտեմբերի 29-ին Երևանում «Ռոսատոմի» ղեկավար Ալեքսեյ Լիխաչովը լրագրողների հետ զրույցում ասել էր, որ Հայաստանի կառավարությանն առաջարկել են 1 ԳՎտ (1000 ՄՎտ) հզորությամբ ԱԷԿ-ի նոր էներգաբլոկ կառուցել։ Հոկտեմբերի 6-ին ՀՀ վարչապետ Նիկոլ Փաշինյանը հայտարարեց, որ Հայաստանը դեռ վերջնական որոշում չի կայացրել նոր ԱԷԿ-ի տեխնոլոգիայի վերաբերյալ, սակայն ռուսական տարբերակը չի բացառվում։Փաշինյանն ավելի վաղ հայտարարել էր, որ ԱԷԿ-ի շահագործման ժամկետը կարող է երկարաձգվել մինչև 2046 թվականը՝ ՄԱԳԱՏԷ-ի հետ համաձայնությամբ։