Քրեական ոստիկանությունը Երևանում թրաֆիքինգի ենթադրյալ դեպք է բացահայտել։ ՆԳՆ հաղորդմամբ՝ օտարերկրյա մի քաղաքացի բարձր աշխատավարձի կեղծ խոստումով երկու օտարերկրացու տեղափոխել է Հայաստան, վերցրել նրանց անձնագրերը և ստիպել համակարգչային հափշտակություններ կատարել մայրաքաղաքի հյուրանոցներից մեկում։ Ոստիկանությունը պարզել է նաև, որ նույն անձի համակարգմամբ հյուրանոցում համակարգչային հափշտակություններով զբաղվել են ևս 39 օտարերկրացիներ։ Նախաձեռնվել է քրեական վարույթ, իսկ ենթադրյալ կազմակերպիչը կալանավորվել է։ ՆԳՆ ոստիկանության հաղորդագրությունը՝ ստորև․ «Քրեական ոստիկանները ձերբակալել են թրաֆիքինգով զբաղվող օտարերկրացի տղամարդու․ նա կալանավորվել է ՆԳՆ Քրեական ոստիկանության գլխավոր վարչությունում օպերատիվ տեղեկություն էր ստացվել, որ օտարերկրյա քաղաքացի մի տղամարդ Հայաստանում զբաղվում է թրաֆիքինգով։ Քրեական ոստիկանները օպերատիվ-հետախուզական միջոցառումների արդյունքում փաստական տվյալներ են ձեռք բերել, որ նա հավաքագրել և բարձր աշխատավարձ վճարելու կեղծ խոստումով Հայաստան է տեղափոխել երկու օտարերկրացիների, ապա վերցնելով նրանց անձնագրերը և օգտվելով անօգնական վիճակից՝ Երևան քաղաքի Քըրք Քրքորյան փողոցում գտնվող հյուրանոցներից մեկոում ստիպել է կատարել համակարգչային հափշտակություններ։ Հետագա միջոցառումներով քրեական ոստիկանները պարզել են, որ վերոհիշյալ քաղաքացու համակարգմամբ նշված հյուրանոցում համակարգչային հափշտակությամբ են զբաղվում նաև օտարերկրյա 39 այլ քաղաքացի։ Նախաձեռնվել է քրեական վարույթ։ Օտարերկրյա քաղաքացին կալանավորվել է»։