ԵՐԵՎԱՆ, 22 հոկտեմբերի – Sputnik. Մասիս համայնքի ղեկավարի «Քաղաքացիական պայմանագիր» կուսակցության թեկնածու Հովհաննես Հակոբյանի` երեխային հեռախոս խոստանալու դեպքով քրեական վարույթ է նախաձեռնվել։«Բարեգործության արգելքը խախտելու առերևույթ հանցագործության դեպքի առթիվ ՀՀ հակակոռուպցիոն կոմիտեում նախաձեռնվել է քրեական վարույթ՝ քրեական օրենսգրքի 221–րդ հոդվածով (հանրաքվեի կամ ընտրության ժամանակ բարեգործության արգելքը խախտելը)։ Կատարվում է նախաքննություն»,– Sputnik Արմենիային հայտնեցին ՀՀ հակակոռուպցիոն կոմիտեից։Նշենք, որ համացանցում Հովհաննես Հակոբյանի մասնակցությամբ տեսանյութ էր հրապարակվել, ըստ որի` նախընտրական հանդիպումների շրջանակում թեկնածուն անչափահաս երեխային հեռախոս է խոստանում։ Դրանից հետո երեխան երգում է և ներկաներին կոչ անում ընտրել հենց Հովհաննես Հակոբյանին։Հավելենք, որ հոկտեմբերի 19-ին ՀՀ վարչապետ Նիկոլ Փաշինյանը գրառում էր արել սոցցանցում և ՏԻՄ ընտրություններին մասնակցող բոլոր այն թեկնածուներին կամ ընտրողներին, որոնք ասում են, որ ենթարկվել են ապօրինի ճնշումների, կոչ էր արել ուղիղ դիմել իրեն՝ nikolpashinyan@gmail.com էլեկտրոնային փոստի հասցեով: Նա նաև շեշտել էր, որ նման գործողություն իրականացրած ցանկացած պաշտոնյա հրապարակային կպատժվի:Նրա կոչին արձագանքել էր ընդամենը 3 մարդ: Հատկանշական է, որ նրանցից մեկը «Ուժեղ Հայաստան» խմբակցության պատգամավոր Անդրանիկ Գևորգյանն էր։ Նա մի քանի տեսանյութ էր ուղարկել Ստեփանավանում «Ուժեղ Հայաստանի» աջակիցներին կամ անդամներին աշխատանքից ազատելու մասին, որոնց ՀՀ վարչապետը պատասխանել էր հերքումով։