Թուրքիայում գազի սակագնի մի քանի անգամ թանկ լինելու պարագայում գյուղմթերքի էժանության պատճառն այն է, որ այդ երկրում տնտեսվարողներին արտահանման համար ահռելի չափով սուբսիդիաներ են տրամադրվում։ Sputnik Արմենիայի հետ զրույցում այս տեսակետը հայտնեց փորձագետ, ՀՀ գյուղատնտեսության նախկին փոխնախարար Աշոտ Հարությունյանը։Ճեպազրույցի ժամանակ անդրադառնալով գազի սակագնի հնարավոր բարձրացմանը՝ ՀՀ վարչապետ Նիկոլ Փաշինյանն այսօր հայտարարել էր՝ պետք է հասկանալ` ինչպես է ստացվում, որ հարևան Թուրքիայում գազը 2-3 անգամ թանկ է, սակայն այնտեղ աճեցրած լոլիկը Հայաստանում աճեցրածից էժան է։Գյուղատնտեսության նախկին փոխնախարարի խոսքով` այդ սուբսիդիաները Թուրքիայում տնտեսվարողներին համակարգված ու երկարատև տարբերակով են տրամադրվում։Հայաստանում ըստ տրամադրության են սուբսիդավորում գյուղոլորտի արտադրանքի համար ծախսերը, նշում է փորձագետն ու հավելում, որ պետական ապարատում որակյալ մասնագետների ու խորհրդատուների պակաս կա, ինչն էլ ազդում է գումարները ծախսելու արդյունավետության վրա։Հավելենք, որ Հայաստանը գազ է գնում 1000 խմ-ի դիմաց 177,5 դոլար գնով։ Դրանից էժան Ռուսաստանը գազ է մատակարարում միայն Բելառուսին։