Աննա Հակոբյանի առաջարկով մշակված ընտանեկան բռնության մասին օրենքի նախագիծը առաջիկա երկուշաբթի օրը կքննարկվի ԱԺ ՄԻՊ հանձնաժողովում, որտեղ հարակից զեկույցով հանդես կգա նաև ՆԳ նախարար Արփինե Սարգսյանը։ ԱԺ Մարդու իրավունքների պաշտպանության և հանրային հարցերի մշտական հանձնաժողովում երկուշաբթի՝ ժամը 09։00-ին, երկրորդ նիստը տեղի կունենա «Ընտանեկան և կենցաղային բռնության կանխարգելման ու ընտանեկան և կենցաղային բռնության ենթարկված անձանց պաշտպանության մասին» օրենքում փոփոխություններ և լրացումներ կատարելու վերաբերյալ։ Նախագծի հեղինակներն են ՔՊ պատգամավորներ Զարուհի Բաթոյանը, Ծովինար Վարդանյանը և Սոնա Ղազարյանը։ Հարակից զեկույցով հանդես կգան ՆԳ նախարար Արփինե Սարգսյանն ու ՔՊ պատգամավոր Թագուհի Ղազարյանը։ Հիշեցնենք, որ ԱԺ հանձնաժողովում առաջին նիստը տեղի ունեցավ հոկտեմբերի 1-ին, որի ժամանակ որոշում կայացվեց նախագծի քննարկումը հետաձգել մինչև երկու ամիս՝ լրացուցիչ լրամշակումներ կատարելու նպատակով։ Նիստից հետո ՔՊ պատգամավոր Զարուհի Բաթոյանը, անդրադառնալով վարչապետի տիկին Աննա Հակոբյանի առաջարկած ընտանեկան բռնության դեմ պայքարի օրենսդրական նախագծին, նշել էր, որ ներառվել են նաև Աննա Հակոբյանի առաջարկները, իսկ նախագիծը հետաձգվեց, քանի որ առաջարկներ են ստացել Կառավարությունից, ԱԺ պատգամավորներից ու ՀԿ-ներից։ Նշենք, որ նախաձեռնության շրջանակում ՔՊ պատգամավորները հանդիպել են նաև Աննա Հակոբյանի հետ, որի ժամանակ, Բաթոյանի փոխանցմամբ, նա խրախուսել է դրական քվեարկել նախագծին։ Հերմինե Միքայելյան –00—ՅՄ The post ՆԳ նախարարը հարակից զեկուցող կլինի ԱԺ-ում Աննա Հակոբյանի առաջարկած օրինագծի քննարկման ժամանակ appeared first on 24News .