Կառավարությունը հաստատել է Մարդու իրավունքների եվրոպական դատարանի (ՄԻԵԴ) վճիռներով և որոշումներով սահմանված արդարացի փոխհատուցումների վճարման միասնական կարգը։ Սահմանվել են փոխհատուցում ստանալու համար անհրաժեշտ փաստաթղթերի ցանկը, դրանց ներկայացման եղանակներն ու պահանջները, ինչպես նաև վճարման գործընթացում պատասխանատու պետական ստորաբաժանումների լիազորությունները։ Փաստաթղթերը հնարավոր կլինի ներկայացնել էլեկտրոնային կամ թղթային տարբերակով։ Կառավարության հաղորդագրությունը՝ ստորև․ «Գործադիրը հաստատել է Մարդու իրավունքների եվրոպական դատարանի վճիռներով կամ որոշումներով սահմանված արդարացի փոխհատուցման տրամադրման, այն ստանալու նպատակով ներկայացվող անհրաժեշտ փաստաթղթերի ցանկը և դրանց ներկայացման կարգը։ Մասնավորապես, սահմանվում են Եվրոպական դատարանի վճիռների կամ որոշումների ուժի մեջ մտնելուց հետո վճարման գործընթացի կազմակերպման և իրականացման շրջանակում կատարվող գործողությունների հաջորդականությունը, ինչպես նաև Վարչապետի աշխատակազմի միջազգային իրավական հարցերով ներկայացուցչի գրասենյակի, ֆինանսական և հաշվապահական հաշվառման վարչության և այլ ներգրավված ստորաբաժանումների լիազորությունները։ Սահմանվում են անհրաժեշտ փաստաթղթերի ներկայացման եղանակները՝ էլեկտրոնային և/կամ թղթային ձևերով, ներկայացվող փաստաթղթերի նկատմամբ կիրառվող պահանջները, օտար լեզվով կազմված փաստաթղթերի պատշաճ հայերեն թարգմանությամբ ներկայացնելու անհրաժեշտությունը, ինչպես նաև ներկայացուցչության և իրավահաջորդության դեպքերում ներկայացվող լրացուցիչ փաստաթղթերի շրջանակը»։