ԵՐԵՎԱՆ, 22 հոկտեմբերի – Sputnik․ Վայոց Ձորի Եղեգիս համայնքի ղեկավար Արթուր Ստեփանյանին «Քաղաքացիական պայմանագիր» կուսակցությունից հեռացնելու պատճառը ոչ միայն կուսակցական կարգապահությունն է, այլև քաղաքական հավատարմության հետ կապված խնդիրները։ Այս մասին գրում է «Ժողովուրդ» օրաթերթը։ԶԼՄ–ի տեղեկություններով՝ այս հանգամանքները քննարկվել են կուսակցության վերահսկող հանձնաժողովում, որտեղ համայնքապետին նկատողություն է արվել նման վարքագիծ դրսևորելու անթույլատրելիության վերաբերյալ։ՔՊ-ից թերթին փոխանցել են, որ Ստեփանյանը պնդել է, թե տեղի ունեցածը թյուրիմացություն է, իրեն սխալ տեղեկություններ են փոխանցել, և ինքը որևէ կերպ չի աջակցել ընդդիմադիր ուժին։ Սակայն կուսակցության ներսում եղած կասկածները չեն փարատվել։Հիշեցնենք՝ հոկտեմբերի 20-ին հայտնի դարձավ, որ Վայոց Ձորի Եղեգիս համայնքի ղեկավար Արթուր Ստեփանյանը հեռացվել է «Քաղաքացիական պայմանագիր» կուսակցությունից։Հակակոռուպցիոն դատարանը 2024թ․-ից քննում է Արթուր Ստեփանյանին վերաբերող քրեական գործը։ Նա մեղադրվում է առանձնապես խոշոր չափերով վստահված գույքի հափշտակության, պաշտոնեական կեղծիքի մեջ։Դատարանը Ստեփանյանի նկատմամբ որպես խափանման միջոց ընտրված կալանավորումը փոխել էր համակցված այլընտրանքային խափանման միջոցներով` վարչական հսկողություն և 3 մլն դրամ գրավ` միաժամանակ կասեցնելով նրա պաշտոնավարումը։ Նաև արգելել էր Արթուր Ստեփանյանին հաղորդակցվել վարույթին օժանդակող անձանց` վկաների և մյուս մեղադրյալների հետ:Ստեփանյանը համայնքի ղեկավարի պաշտոնը զբաղեցնում է 2017թ․-ից։ Թեպետ բնակիչները դժգոհ էին նրա աշխատանքից, անգամ բողոքի ակցիաներ էին կազմակերպել, բայց 2022թ․ նա ՔՊ–ի ցուցակով վերընտրվեց իր պաշտոնում։