Բաքվի ու Անկարայի հարաբերություններում առկա լարվածություն ֆոնին Թուրքիայի նախագահ Ռեջեփ Թայիփ Էրդողանն ու Ադրբեջանի նախագահ Իլհամ Ալիևը հեռախոսազրույց են ունեցել։ Թուրքիայի նախագահականի հաղորդմամբ ՝ երկու առաջնորդները քննարկել են թուրք-ադրբեջանական հարաբերությունները, ինչպես նաև տարածաշրջանային և գլոբալ զարգացումները։ Էրդողանը նշել է, որ Թուրքիան և Ադրբեջանը, առաջնորդվելով եղբայրության ոգով, շարունակելու են զարգացնել համագործակցությունը։ Շնորհավորելով Ալիևին Ադրբեջանի պետական անկախության վերականգնման 35-րդ տարեդարձի առթիվ՝ Էրդողանը նրան հրավիրել է մասնակցելու Անկարայում կայանալիք Թյուրքական պետությունների կազմակերպության 13-րդ գագաթնաժողովին։ Ադրբեջանական կողմը ևս հայտարարություն է տարածել հեռախոսազրույցի վերաբերյալ՝ նշելով, որ զանգահարողը եղել է Էրդողանը։ Ալիևը շնորհակալություն է հայտնել Թուրքիայի նախագահին հեռախոսազանգի և շնորհավորանքների համար՝ վստահություն հայտնելով, որ երկու երկրների եղբայրական հարաբերությունները հետագայում ևս հաջողությամբ կզարգանան։ Հիշեցնենք, որ թուրք-ադրբեջանական հարաբերություններում լարվածություն է առաջացել Ադրբեջանի դպրոցներում հիջաբ կրելու արգելքի պատճառով, որն արժանացել է Թուրքիայի հասարակական շրջանակների բուռն քննադատությանը։ Բաքուն նաև մի շարք կոշտ քայլեր է ձեռնարկել․ Ադրբեջանի արտաքին գործերի նախարարությունը Թուրքիայի 31 քաղաքացու ներառել է անցանկալի անձանց ցուցակում, իսկ երկրի գլխավոր դատախազությունը միջազգային հետախուզում է հայտարարել Թուրքիայում բնակվող և գործունեություն ծավալող յոթ անձի նկատմամբ՝ Ադրբեջանում իշխանությունը բռնի զավթելու հրապարակային կոչերի գործով։ Թարգմանությունը՝ Էմմա Չոբանյանի Բաքուն Թուրքիայի 31 քաղաքացու, այդ թվում՝ իշխանական գործիչների, ներառել է անցանկալի անձանց ցուցակում և արգելել մուտքը երկիր