ԱՄՆ նախագահի հատուկ բանագնաց Սթիվ Ուիթքոֆը Սանկտ Պետերբուրգում ՌԴ նախագահ Վլադիմիր Պուտինի հետ հանդիպմանը վերջինիս տեղեկացրել է Կիևի և Եվրոպայի նոր մոտեցումների մասին, որոնք քննարկվել են հոկտեմբերի 20-ին Օսլոյում տեղի ունեցած բանակցությունների ընթացքում։ «Արմենպրես»-ի փոխանցմամբ՝ ՏԱՍՍ-ը տեղեկացնում է, որ այս մասին հայտնել է ՌԴ նախագահի օգնական Յուրի Ուշակովը, որը ներկա է եղել հանդիպմանը։ Նա նշել է, որ հանդիպման գլխավոր թեման եղել է Ուկրաինան. կողմերը կարծիքներ են փոխանակել Ուկրաինայում կանուն խաղաղության հասնելու ուղիների վերաբերյալ։ Ուշակովի խոսքով՝ քննարկվել է նաև Ռուսաստանի, ԱՄՆ-ի և Ուկրաինայի ներկայացուցիչների մասնակցությամբ եռակողմ բանակցությունների հնարավոր վերսկսման սխեման։ Պուտինը նշել է, որ ՌԴ-ն պատրաստ է եռակողմ բանակցությունները վերսկսել նոյեմբերի 10-ին։ ՌԴ նախագահը ԱՄՆ բանագնացին տեղեկացրել է ռազմական գործողությունների գոտում տիրող իրավիճակի մասին, որտեղ, Ուշակովի խոսքով, ռուսական զորքերը ռազմավարական առավելություն ունեն։ Պուտինը և Ուիթքոֆը նաև նշել են, որ ԱՄՆ-ի և Ռուսաստանի միջև դիզելային վառելիքի մատակարարումների շուրջ ձեռք բերված համաձայնագիրը կօգնի կայունացնել վառելիքի համաշխարհային շուկաները։ Քննարկվել են նաև Չինաստանի նախագահ Սի Ծինփինի և ԱՄՆ նախագահ Դոնալդ Թրամփի հետ Պուտինի եռակողմ հանդիպման հեռանկարները։ Պուտինը նշել է, որ Ռուսաստանը պատրաստ է աջակցել Իրանի շուրջ իրավիճակի կարգավորման գործում։ Ուշակովի տեղեկացմամբ՝ կողմերը քննարկել են նաև Ռուսաստանի և ԱՄՆ-ի միջև մասշտաբային տնտեսական նախագծերը, որոնք համագործակցության նոր հեռանկարներ են բացում։ Հոկտեմբերի 20-ին Ուիթքոֆն Օսլոյում հանդիպել էր Ուկրաինայի նախագահ Վոլոդիմիր Զելենսկու, Նորվեգիայի վարչապետ Յոնաս Գար Ստյորեի և Ֆինլանդիայի նախագահ Ալեքսանդր Ստուբի հետ։