Անմեղության կանխավարկածի համակարգված խախտումներ, ընտրական գործընթացին համակարգված միջամտություններ, վարչական ռեսուրսի անզսպելի չարաշահումներ՝ սա է իշխանությունների անամնեզը։ Այս մասին ֆեյսբուքյան իր էջում գրում է ԱԺ փոխնախագահ Արամ Վարդևանյանը։ «Սահմանադրական դատարանն իշխանական նման վարքագծի մասին խոսել էր և որպես ընտրախախտում էր արձանագրել, ԵԽԽՎ-ն սրա մասին խոսել էր և պահանջ էր դրել դադարեցնել ընտրովի հետապնդումները։ Ավագանու ընտրություններից ընդամենը չորս օր առաջ ռեպրեսիվ մեքենան գործադրել, տեսանյութեր տարածել, պարզ է, որ այս ամենի նպատակը ընտրական գործընթացին հակաժողովրդավարական միջամտությունն է։ Քրեական գործ եք հարուցել, օրենքի հիման վրա քննություն արեք, ոչ թե վախ տարածեք, կամ դրանով փորձեք առավելություն ստանալ»,- գրել է նա։ Հիշեցնենք՝ ընտրակաշառք տալու, դրան օժանդակելու, ինչպես նաև ընտրակաշառք ստանալու մեղադրանքներով ձերբակալվել են «Ուժեղ Հայաստան» կուսակցության ցուցակը գլխավորող թեկնածու Արսեն Գևորգյանը և «Ուժեղ Հայաստան»-ի 13 անդամներ ու աջակիցներ։ Ըստ Հակակոռուպցիոն կոմիտեի ՝ «Ուժեղ Հայաստան» կուսակցության ցուցակը գլխավորող թեկնածուն ավագանու անդամների թեկնածուների, ինչպես նաև կուսակցության անունից հանդես եկող անձանց օժանդակությամբ, նույն համայնքում ընդգրկված տարբեր բնակավայրերի մի քանի տասնյակ ընտրողների տվել է ընտրակաշառք։ Բացի այդ, նախապատրաստվել է ընտրակաշառք տալ 3 տասնյակ ընտրողների նույնպես։ The post Վախ տարածելով՝ փորձում են ընտրական առավելություն ստանալ․ Արամ Վարդևանյան appeared first on Infocom .