«Թրամփի ուղի» (TRIPP) տարածաշրջանային հաղորդակցության ծրագրի շրջանակներում Հայաստանի տարածքով արգելված բեռների, մասնավորապես՝ զենքի և զինամթերքի փոխադրումն անհնար է լինելու, և այդ հարցում կողմերի միջև կա փոխըմբռնում։ Այս մասին Ազգային ժողովի արտաքին հարաբերությունների մշտական հանձնաժողովի նիստում հայտարարեց ՀՀ ԱԳՄԱ նախարար Արարատ Միրզոյանը։ «Այդ ցանկերը շատ երկրների հայտնի են։ Ե՛վ մեր, և՛ Ադրբեջանի միջև կա ըմբռնում այդ մասին, որ արգելված բեռներ, օրինակ՝ զենք, զինամթերք չի կարող անցնել, վտանգավոր քիմիական նյութեր և այլն։ Կա նաև ապրանքների կատեգորիա, որոնք կարող են անցնել, բայց նախապես պետք է հարցում արվի»,- ասաց նախարարը։ Միրզոյանը նաև մանրամասնեց, թե ինչ է նշանակում պայմանագրերում ամրագրված «անխոչընդոտ անցում» ձևակերպումը՝ հերքելով մտավախությունները, թե սահմանային և մաքսային հսկողություն չի իրականացվելու։ «Մաքսային, սահմանային օրենսդրության շրջանակներում արվող բոլոր տրամաբանական գործողությունները խոչընդոտ չեն։ Բեռները պետք է հայտարարագրվեն, անցնեն համապատասխան սկաներներով և ստուգումներով։ Խոչընդոտ ասելով նկատի ունենք արհեստական, քաղաքական դրդապատճառներով ստեղծվող քաշքշուկները, երբ չեղած տեղից, առանց որևէ հիմքի կանգնեցնում կամ բացում են բեռները։ Այնպես որ, օրինական հսկողության իրականացումը որևէ մեկը չի վիճարկում»,- ընդգծեց Արարատ Միրզոյանը։ Մանրամասները՝ տեսանյութում։ Անի Թամրզայան