Վրաստանի կառավարության նպատակն է մինչև 2031 թվականի վերջն ամբողջությամբ ավարտել բոլոր ավտոմայրուղիների շինարարությունը, և այս ծրագրի բաղադրիչներից մեկը Թբիլիսիի շրջանցիկ ճանապարհն է։ Ինչպես գրում է bizzone.info-ը, այս մասին հայտարարել է Վրաստանի վարչապետ Իրակլի Կոբախիձեն։ Վերջինիս խոսքով՝ ծրագրի համաձայն՝ մինչև 2030 թվականը Թուրքիայի հետ սահմանին գտնվող Սարփիից մինչև Ադրբեջանի հետ սահմանին գտնվող «Կարմիր կամուրջ» և Հայաստանի հետ սահմանին գտնվող Սադախլո կձգվի անընդհատ քառուղի ավտոմայրուղի։ «Մենք հստակ նպատակ ունենք՝ մինչև 2031 թվականի վերջն ամբողջությամբ ավարտել բոլոր ավտոմայրուղիների շինարարությունը։ Այս ծրագրի բաղադրիչներից մեկը Թբիլիսիի շրջանցիկ ճանապարհն է, որը չափազանց կարևոր է միջսահմանային հաղորդակցությունը հեշտացնելու համար։ Մասնավորապես, այս ճանապարհը կշրջանցի Թբիլիսին, ինչը շատ կարևոր է քաղաքի տրանսպորտային բեռնաթափման համար։ Հետևաբար, այս ներդրումները անպայման կիրականացվեն», — հայտարարել է Կոբախիձեն։