Քաղաքագետ, ամերիկագետ Մալեկ Դուդակովը Alpha News-ի հետ զրույցում անդրադարձել է ԱՄՆ նախագահ Դոնալդ Թրամփի հատուկ բանագնաց Սթիվ Ուիթքոֆի այցին և Ուկրաինայում հակամարտության կարգավորման շուրջ բանակցությունների հեռանկարներին։ Փորձագետի խոսքով՝ այցն անցնում է առանց Ջարեդ Քուշների մասնակցության, իսկ ԱՄՆ-ի և եվրոպական երկրների դիրքորոշումները հնարավոր խաղաղության համաձայնագրի պայմանների վերաբերյալ էապես տարբերվում են։ «Իրականում սա Սթիվ Ուիթքոֆի իսկապես նշանակալի այցն է՝ արդեն առանց Ջարեդ Քուշների մասնակցության, քանի որ, ինչպես գիտենք, Քուշները առողջական խնդիրներ ունի՝ գրիպով է հիվանդացել։ Հետևաբար, այս պահին Սթիվ Ուիթքոֆը գործում է ինքնուրույն՝ առանց գործընկերոջ։ Նախ նա հանդիպել է ուկրաինական լոբբիի ներկայացուցիչների և եվրոպական «պատերազմի կուսակցության» ներկայացուցիչների հետ, որից հետո մեկնել է մեր երկիր։ Ակնհայտ է, որ նա կփորձի ներկայացնել ինչ-որ միասնական ծրագիր, թե ինչ կարող է մեզ առաջարկել հավաքական Արևմուտքը։ Այլ հարց է, որ նրա դիրքորոշումը բարդանում է նախևառաջ այն հանգամանքով, որ իրականում նման ծրագիր գոյություն չունի։ Կա ամերիկյան ծրագիրը, որը ոչ վաղ անցյալում արտահոսել էր մամուլ։ Այն ենթադրում է հակամարտության սառեցում, Ուկրաինային ՆԱՏՕ-ի կանոնադրության 5-րդ հոդվածի մակարդակով անվտանգության երաշխիքների տրամադրում, Ռուսաստանի նկատմամբ պատժամիջոցների մեղմացում և այլն։ Եվրոպացիներն ունեն ավելի կոշտ ծրագիր՝ հակամարտության սառեցում, սակայն միաժամանակ Ուկրաինայի անդամակցություն ՆԱՏՕ-ին։ Այս ծրագրերը լիովին համատեղելի չեն միմյանց հետ։ Իհարկե, դրանք բազմաթիվ հարցեր են առաջացնում նաև մեր կողմից, քանի որ ամբողջությամբ չեն բավարարում մեր պահանջները։ Նախևառաջ, հակամարտության ավարտից հետո անհրաժեշտ է Ուկրաինայի ապառազմականացում, որպեսզի այն այլևս սպառնալիք չներկայացնի Ռուսաստանի համար։ Երկրորդ՝ մեր սահմանադրական սահմանների շրջանակում բոլոր տարածքների ազատագրումը։ Սա այն նվազագույն հիմքն է, որի շուրջ կարելի է խոսել։ Հետևաբար, բնականաբար, հարցեր են առաջանում այդ բանակցությունների հեռանկարների վերաբերյալ»,- ասել է Դուդակովը։ Նրա կարծիքով՝ բանակցությունների հեռանկարները բարդանում են նաև ԱՄՆ-ի ներքաղաքական իրավիճակի պատճառով։ Դոնալդ Թրամփի վարչակազմը ձգտում է մինչև Կոնգրեսի ընտրություններն արտաքին քաղաքականության ոլորտում նշանակալի առաջընթացի հասնել, սակայն դեմոկրատների հնարավոր հաղթանակը կարող է սահմանափակել գործող նախագահի՝ ձեռք բերված պայմանավորվածություններն առաջ մղելու հնարավորությունները։ «Բացի այդ, չպետք է մոռանալ նաև Դոնալդ Թրամփի և նրա վարչակազմի՝ ԱՄՆ-ում ունեցած դիրքերի մասին։ Կոնգրեսի ընտրություններին մնացել է բառացիորեն երկու շաբաթ։ Ամենայն հավանականությամբ, այդ ընտրություններում դեմոկրատները կհաղթեն, իսկ հանրապետականները կպարտվեն։ Այս պարագայում, իհարկե, Թրամփի դիրքերը կթուլանան։ Եվ հարց է առաջանում, թե որքանով նա պատրաստ կլինի առաջ մղել այս կամ այն որոշումները, և արդյոք դրա հնարավորությունը կունենա ԱՄՆ-ում՝ նույնիսկ եթե մի կողմ թողնենք Եվրոպայի գործոնը։ Նա կարող է մեզ հետ այս կամ այն համաձայնագիրը կնքել, բայց ակնհայտ է, որ եթե Կոնգրեսը վերահսկեն դեմոկրատները, ապա դժվար թե նրանք վավերացնեն այն։ Հետևաբար, նույնիսկ եթե մեզ հաջողվի ինչ-որ բանի շուրջ պայմանավորվել Թրամփի վարչակազմի հետ, հարց է մնում՝ արդյոք Թրամփին կհաջողվի ստիպել, որ եվրոպացիներն ու ուկրաինացիները նույնպես ընդունեն այդ պայմանավորվածությունները»,- եզրափակել է Դուդակովը։ The post Ուիթքոֆի այցը չի երաշխավորում առաջընթաց Ուկրաինայի շուրջ բանակցություններում․ Մալեկ Դուդակով appeared first on Alphanews .