Իրանի ուժերի ճնշման ներքո ԱՄՆ ռազմածովային ուժերի նավերը ստիպված են եղել հեռանալ Հորմուզի նեղուցի գոտուց առնվազն 700 կիլոմետրով։ Այս մասին հայտարարել է Իրանի զինված ուժերի էլիտար ստորաբաժանումների՝ Իսլամական հեղափոխության պահապանների կորպուսի պաշտոնական ներկայացուցիչ, բրիգադի գեներալ Հոսեյն Մոհեբին։ «Իրանը ստիպել է ամերիկյան ռազմանավերին և ֆրեգատներին հեռանալ Հորմուզի նեղուցից», — Մոհեբիի խոսքերը մեջբերել է իրանական SNN հեռուստաալիքը։ Նրա պնդմամբ՝ պատերազմից առաջ Պարսից ծոցում տեղակայված էր ԱՄՆ ռազմածովային ուժերի 30-40 նավ, իսկ այժմ դրանք նահանջել են Հորմուզի նեղուցից 700 կիլոմետր հեռավորության վրա։ Իրանցի գեներալը նաև պնդել է, որ Հորմուզի նեղուցը «100 տոկոսով փակ է»։ Նրա խոսքով՝ եթե որոշ փոքր նավերի հաջողվում է անցնել նեղուցով՝ անջատելով նավիգացիոն համակարգերը, դա դեռ չի նշանակում, որ նավարկության համար այն բաց է։ Մոհեբին նման գործողություններն անվանել է «գողություն և մաքսանենգություն»։ Իրանի Իսլամական հեղափոխության պահապանների կորպուսի ներկայացուցչի պնդմամբ՝ ԱՄՆ-ն Հորմուզի նեղուցով «մաքսանենգ ճանապարհով տեղափոխում է» առավելագույնը 1-2 միլիոն բարել նավթ։ «Եվ դա հսկայական ծախսերի գնով է հաջողվում», — նշել է բրիգադի գեներալը։