ԵՐԵՎԱՆ, 19 հոկտեմբերի – Sputnik. Երևանում 1614,1 քմ մակերեսով մարզահամալիրի նկատմամբ ««Հայաստան» մարզական միություն» ՀԿ–ի սեփականության իրավունքի գրանցումը ճանաչվել է ոչ իրավաչափ։ Տեղեկությունը հայտնում է ՀՀ գլխավոր դատախազությունը։ Գլխավոր դատախազությունից նշում են, որ 2024 թ. նոյեմբերի 8–ին հայցադիմում էին ներկայացրել ՀՀ վարչական դատարան՝ ընդդեմ կադաստրի կոմիտեի՝ Երևան քաղաքի Ցախի 18 հասցեում գտնվող՝ 1614,1 քմ մակերեսով մարզահամալիրի («Սպարտակ» մարզադաշտ-խմբ.) նկատմամբ ««Հայաստան» մարզական միություն» ՀԿ սեփականության իրավունքի՝ 1999 թ. դեկտեմբերի 29-ի պետական գրանցումը ոչ իրավաչափ ճանաչելու պահանջով:Միայն երկու տարի անց` հոկտեմբերի 7–ին, ՀՀ վարչական դատարանն իր վճռով բավարարել է դատախազության հայցը և արձանագրել, որ ««Հայաստան» մարզական միություն» ՀԿ սեփականության իրավունքի գրանցման համար հիմք է հանդիսացել Ժողովրդական դեպուտատների Երևանի քաղաքային խորհրդի գործադիր կոմիտեի 1991 թվականի հուլիսի 10-ի թ որոշումը։Այդ իսկ պատճառով, ըստ դատարանի` մարզահամալիրի նկատմամբ ««Հայաստան» մարզական միություն» ՀԿ սեփականության իրավունքի պետական գրանցումը ոչ իրավաչափ է։ ՀՀ գլխավոր դատախազությունից վստահեցնում են, որ դատական այս ակտի հիման վրա, պետական շահերի պաշտպանության հայց հարուցելու լիազորության շրջանակում, անշարժ գույքը պետությանը վերադարձնելու նպատակով միջոցներ կձեռնարկեն։Նշենք, որ ներկայումս ՀՀ վարչական դատարանում քննվում է գլխավոր դատախազության ներկայացրած ևս մեկ հայցադիմում՝ վերոնշյալ մարզահամալիրի հետագա օտարումներն ու դրանց պետական գրանցումներն անվավեր ճանաչելու և գույքը պետությանը վերադարձնելու պահանջներով:Հիշեցնենք, որ «Սպարտակը» Հայաստանի երկրորդ ամենահին մարզադաշտն է Գյումրիի քաղաքային մարզադաշտից հետո: Այն 2024 թ. վաճառվել էր 5 մլրդ դրամով։ Նախաձեռնված քրեական վարույթի շրջանակում գույքի նկատմամբ արգելանք է կիրառվել։