Քանի որ Նիկոլ Փաշինյան արտաքին քաղաքականությունը կառուցում է ֆոբիաների հիման վրա, և ԵԱՏՄ անդամ երկրների սահմանած դեդլայնի ժամկետը՝ դեկտեմբերի 30-ը, մոտենում է, նա սկսել է իրեն ապահովագրել հնարավոր ռիսկերից։ 168.am-ի եթերում այս մասին ասաց քաղաքագետ, «Դեմոկրատական այլընտրանք» կուսակցության նախագահ Սուրեն Սուրենյանցը։ Ըստ նրա՝ Փաշինյանը շատ լավ հասկանում է, որ ԵԱՏՄ բոնուսներից զրկվելը կատաստրոֆիկ հետևանքներ է ունենալու ոչ միայն Հայաստանի Հանրապետության, այլ հենց իր իշխանության կայունության համար։ Անդրադառնալով ԱԳՄԱ նախարար Արարատ Միրզոյանի վերջին հայտարարությանը, որ Հայաստանի և ՌԴ-ի հարաբերությունները եղբայրական են՝ Սուրենյանցը հիշեցրեց՝ «եղբայրական» որակումը պետությունների հարաբերությունների հատկանիշ չէ, հետևաբար այդ ռոմանտիկ ձևակերպումն ավելի շատ քողարկում է բովանդակության բացակայություն, քան դիտարկվում ջերմ հարաբերությունների վկայություն։ «ՌԴ-ի ուղղությամբ ձնհալ հիշեցնող քայլեր կան, բայց չեմ համարձակվի պնդել, որ գործ ունենք Փաշինյանի արկածախնդիր քաղաքականության վերանայման հետ։ Այդ քաղաքականության երկու հիմքերը պահպանվում են. մեկը ԵՄ անդամակցության օրենքն է, որը թունավորում է հայ-ռուսական հարաբերությունները, մյուսը 2026-2031 թթ. կառավարության ծրագիրն է, որտեղ Ռուսաստանը Արարատ Միրզոյանի նկարագրած եղբայրական պետության կարգավիճակում չէ, այլ ուղղակի գործընկեր է։ Փաշինյանը վախից ռիսկերը կառավարելու նպատակով ՌԴ-ին տակտիկակական զիջումներ է անում (նկատի ունի ատոմակայանի և երկաթուղու կոնսեցիոն կառավարման հարցերում տեսակետի փոփոխությունը՝ խմբ.), բայց արտաքին քաղաքականության վերանայման մասին խոսելը շատ շուտ է»,- ասաց բանախոսը։ Ըստ քաղաքագետի՝ մոտ ապագայում Նիկոլ Փաշինյանը հայտնվելու է քաղաքական ճողվածքի ռեժիմում, որտեղ մանևրի և «կռուտոյ խաղեր տալու» հնարավորությունը գնալով սահմանափակվելու է։ «Նիկոլ Փաշինյանի վարած քաղաքականությունը Հայաստանը գուբերնիայի վերածելու կարճ ճանապարհ է. չհաշվարկված աքլորություն ես անում, հետո բամփում են գլխիդ»,- ասաց նա։ The post Փաշինյանը հայտնվելու է քաղաքական ճողվածքի ռեժիմում, որտեղ մանևրի և «կռուտոյ խաղեր տալու» հնարավորությունը վերանալու է. քաղաքագետ appeared first on Ազգ .