ԱՄՆ պետքարտուղար Մարկո Ռուբիոն Սամարղանդում հանդիպում է անցկացրել Ուզբեկստանի, Ղազախստանի, Ղրղզստանի, Թուրքմենստանի և Տաջիկստանի իր պաշտոնակիցների հետ: «Արմենպրես» -ի փոխանցմամբ՝ այս մասին հաղորդում է Reuters գործակալությունը: Նախարարական հանդիպմանը քննարկվել են առևտուրը, ներդրումները և տարածաշրջանային գործակցությունը: Ռուբիոն շեշտել է, որ Կենտրոնական Ասիան կարևոր ուղղություն է դառնում ներդրումների և արտահանումների համար: «Կենտրոնական Ասիան նաև ներդրումների նոր ուղղություն է և արտահանման նոր կենտրոն՝ կենտրոնական տերմինալ, որտեղից մատակարարվում են բոլոր երկրների ապագայի համար կենսական նշանակություն ունեցող նյութեր։ Միացյալ Նահանգներում մենք ձգտում ենք ապահովել մեր կարևոր արդյունաբերությունների և դրանք սպասարկող մատակարարման շղթաների անվտանգությունը, որպեսզի լինենք ինքնիշխան, անկախ երկիր և տնտեսություն ու երբեք ստիպված չլինենք ապավինել ռիսկային օտարերկրյա գործընկերներին կամ նույնիսկ հակառակորդներին», – նշել է Ռուբիոն։ «Այս համաժողովը՝ «C5+1» (խմբ.՝ Կենտրոնական Ասիայի հինգ պետություններ և ԱՄՆ) ձևաչափն, արտացոլում է ոչ միայն Ամերիկայի շահագրգռվածությունը, այլև նրա հանձնառությունը՝ նպաստելու Կենտրոնական Ասիայի երկրների հետ առավել սերտ և խաղաղ հարաբերությունների զարգացմանը», – հավելել է նա։ Ռուբիոն նշել է, որ Անդրկասպյան առևտրային երթուղու ենթակառուցվածքները կարդիականացվեն, և գործընկերներն ավելի լայն հնարավորություններ կունենան՝ մուտք գործելու ամերիկյան և Կենտրոնական Ասիայի շուկաներ: ԱՄՆ նախագահ Դոնալդ Թրամփը Կենտրոնական Ասիայի երկրների ղեկավարներին Սպիտակ տանն ընդունել էր 2025 թ. նոյեմբերին: —00—ԼԱ The post Ռուբիոն կարևորել է Կենտրոնական Ասիայի դերը ներդրումների և մատակարարումների ոլորտում appeared first on 24News .