Ալբանիայի մայրաքաղաք Տիրանայի կենտրոնում շարունակվում են հակակառավարական ցուցարարների և ոստիկանության բախումները։ Այս մասին հաղորդում է ATA գործակալությունը։ Ալբանիայի մայրաքաղաքում անկարգությունները շարունակվում են արդեն վեցերորդ օրը։ Ցուցարարները ոստիկանների ուղղությամբ նետում են դյուրավառ խառնուրդով շշեր, իսկ իրավապահները արցունքաբեր գազ են կիրառում։ Կիրակի ավելի վաղ ցուցարարները քարերով կոտրել են իշխող Ալբանիայի սոցիալիստական կուսակցության կենտրոնակայանի շենքի ապակիները։ Տիրանայում անկարգությունները սկսվել են հոկտեմբերի 13-ին՝ Ալբանիայի կրթության նախարարության շենքի մոտ ուսանողական բողոքի ակցիայի ընթացքում։ Ցուցարարները պահանջում են երկրի վարչապետ Էդի Ռամայի հրաժարականը։ Ընդդիմադիր Դեմոկրատական կուսակցության ղեկավար Սալի Բերիշան հայտարարել է, որ աջակցում է բողոքի ցույցերին։ Ավելի վաղ Ռաման հայտնել էր, որ իր՝ Տիրանայի նստավայրի մերձակայքում վնասազերծել են պայթուցիկով անօդաչու թռչող սարք։ Նա նաև պնդել էր, թե երկրում բողոքի ցույցերը «հրահրվում են արտերկրից»։ Ռուսաստանի ԱԳՆ պաշտոնական ներկայացուցիչ Մարիա Զախարովան կոչ է արել Ալբանիայի վարչապետին երկրի անկարգությունների պատասխանատվությունը չբարդել Ռուսաստանի և Իրանի վրա։ Բախումներին նախորդել էր ավելի քան 130 օր շարունակվող հակակառավարական ցույցերի ալիքը։ Դրանց մասնակիցները դեմ էին իշխանությունների առաջ մղած՝ Ադրիատիկ ծովի ափին գտնվող Վյոսա-Նարտա պահպանվող տարածքում հանգստավայր կառուցելու նախագծին։ Ալբանիայի հատուկ հակակոռուպցիոն դատախազությունը նախկինում հետաքննություն էր սկսել այդ բնապահպանական գոտու կարգավիճակի փոփոխության առնչությամբ։ Տարածքը հանգստավայրի վերածելու մտադրություն ունի ներդրումային Affinity Partners ընկերությունը, որը պատկանում է ԱՄՆ նախագահի փեսա Ջարեդ Քուշներին։ Նախագիծը ներառում է անմարդաբնակ Սազան կղզին և մի քանի հարյուր հեկտար պահպանվող տարածք։